काठमाडौं । एसीसी मेन्स इमर्जिङ एसिया कपमा नेपाली राष्ट्रिय क्रिकेट टिमले भारत ‘ए’ विरुद्ध पहिले ब्याटिङ गर्ने भएको छ । 

श्रीलंकाको कोलम्बोस्थित आर प्रेमादासा रंगशालामा हुने खेलका लागि भएको टस जितेपछि नेपाली टिमका कप्तान रोहितकुमार पौडेलले ब्याटिङको निर्णय गर्दै भारत ‘ए’ लाई फिल्डिङको निम्तो दिएका हुन् ।

भारत ‘ए’ विरुद्ध प्रतिस्पर्धामा उत्रिँदा नेपाली टिम पहिलो जितको खोजीमा हुनेछ ।

प्रतियोगिताको समूह ‘बी’ मा रहेको नेपाली टिम यसअघि पहिलो खेलमा पाकिस्तान ‘ए’ सँग चार विकेटले पराजित भएको थियो । सेमिफाइनल पुग्ने सम्भावना कायम राख्न पनि नेपाली टिमलाई आज जित्नै पर्ने दबाब छ ।

यता, नेपालविरुद्ध मैदान उत्रिँदा भारत ‘ए’ भने लगातार दोस्रो जितसहित प्रतियोगिताको अन्तिम चारमा स्थान पक्का गर्ने लक्ष्यमा हुनेछ । भारतले यसअघि युनाइटेड अरब इमिरेट्स (यूएई) विरुद्ध आठ विकेटको सहज जित निकालेको थियो ।

प्रतियोगितामा नेपालसहित एसियाका आठ टिम सहभागी छन् । सहभागी टिमलाई दुई समूहमा विभाजन गरिएको छ । प्रतियोगिताको समूह ‘ए’मा ओमान, अफगानिस्तान, बंगलादेश र श्रीलंका छन् । समूह ‘बी’मा नेपाल, भारत, पाकिस्तान र युनाइटेड अरब इमिरेट्स (यूएई) छन् ।

समूहबाट शीर्ष दुई टिम सेमिफाइनलमा प्रवेश गर्नेछन् । सेमिफाइनल खेलहरू आउँदो साउन ५ र फाइनल साउन ७ गते हुनेछ ।

प्रतियोगितामा नेपालबाहेक सबै टिमले ‘ए’ टोली पठाएका छन् ।

ध्चष्तभ तय ज्ञद्दप्जबचष् क्उयचतक