काठमाडौं । वैकल्पिक गोलकिपर अञ्जन रानामगर चम्किएपछि दोस्रो अन्तर्राष्ट्रिय मैत्रीपूर्ण फुटबलमा नेपाली राष्ट्रिय महिला टिमले बंगलादेशलाई टाइब्रकेरमा ४–२ ले पराजित गरेको छ ।

ढाकाको कमलपुरस्थित वीरश्रेष्ठ सहिद सिपाही मोहम्मद मुस्तफा कमल रंगशालामा सम्पन्न खेलको निर्धारित समय गोलरहित बराबरीमा सकिएपछि खेलको निर्णय सिधै टाइब्रेकरबाट लिइएको हो ।

टाइब्रेकरमा नेपालकी सावित्रा भण्डारी, हिरा भुजेल, दिपा शाही, अनिता केसीले गोल गरे । तर, गोलकिपर अञ्जनाको प्रहार भने बारमा लाग्दै बाहिरिएको थियो । अञ्जनाले आफ्नो प्रहारलाई गोलमा परिणत गर्न नसके पनि बंगलादेशका दुई प्रहार बचाउँदै नेपाललाई जित दिलाइन् । बंगलादेशकी साम्सुनार र मोनिका चक्माले पेनाल्टीमा गोल गरे । तर, मारिया मण्डा, सेइली अजिमको प्रहार भने गोलरक्षक अञ्जना रानामगरले बचाएकी थिइन् ।

यो जितसँगै नेपाली टिमले ६ खेलसम्मको जितविहीन यात्रा तोडेको छ । नेपाली टिम गत भदौमा सम्पन्न साफ महिला च्याम्पियनसिपको फाइनल खेलदेखि जितविहीन थियो । उक्त फाइनलमा पनि नेपाल बंगलादेशसँग ३–१ ले पराजित भएपछि उपविजेतामा सीमित बनेको थियो ।

नेपाली टिम चीनमा हुने १९औँ एसियन गेम्सको तयारीका लागि दुई मैत्रीपूर्ण खेलका लागि बंगलादेश पुगेको हो । यो जितसँगै नेपालले दुई खेलको शृंखला समेत आफ्नो पक्षमा पारेको छ । यी दुई टिमबीचको पहिलो मैत्रीपूर्ण खेल १–१ को बराबरीमा टुंगिएको थियो । उक्त खेलमा कप्तान सविना खातुनले गोल गर्दै बंगलादेशलाई अग्रता दिलाउँदा इन्जुरी समयमा सावित्रा भण्डारीले नेपालका लागि बराबरी गोल फर्काएकी थिइन् ।