जनकपुरधाम । मधेस प्रदेशको प्रदेशसभाको नाम ‘मधेस प्रदेशसभा’ कायम भएको छ । आइतबार प्रदेशसभामा सर्वसम्मतिले उक्त नाम स्वीकृत गरिएको हो ।

०७८ माघ ३ गते मधेस नामकरण दुई तिहाईले स्वीकृत भएको थियो । मधेस नामकरण भएको डेढ वर्षपछि प्रदेशसभाको अगाडि मधेस थपिएको हो । अब ‘मधेस प्रदेशसभा’ कायम भएको छ ।

लोकतान्त्रिक समाजवादी पार्टी (लोसपा)की सांसद रानी शर्मा तिवारीले प्रदेशसभाको नाम मधेस प्रदेशसभा कायम गर्ने प्रस्ताव संसद्‌मा पेस गरेकी थिइन् । 

पहिचानकै अधारमा मधेस प्रदेशसभा नाम हुनुपर्ने उनले बताएकी थिइन् । त्यसकारण उच्चरण र उल्लेख गर्दा पहिचान झल्किने गरी मधेस प्रदेशसभा हुनुपर्ने आवश्यकता उनले औंल्याइन् । 

जनता समाजवादी पार्टी (जसपा)का सांसद रामअशिष यादवले उक्त प्रस्तावको सर्मथन गरेका थिए । उनले वाग्मती प्रदेशसभा र भारतमा दिल्ली वा विहार विधानसभा भएजस्तै मधेस प्रदेशसभा राख्नुपर्ने बताए । नेकपा (एमाले)का सांसद हरिनारायण महतोले पनि उक्त प्रस्तावलाई सर्मथन गरेका थिए । 

यस विषयमा छलफल प्रारम्भ गरिएको थियो । तर, छलफलमा कुनै पनि सांसदले भाग लिन इच्छुक देखिएनन् । त्यसपछि सभामुख रामचन्द्र मण्डलले उक्त विधेयकमाथि निर्णयार्थ प्रस्तुत गरेका थिए । सांसदहरूले टेबल ठोकेर सहमति जनाएपछि सर्वसम्मतिले उक्त प्रस्ताव स्वीकृत भएको छ । मधेस प्रदेशसभा कायम भएको सबै निकायलाई पत्राचार गरिएको छ ।