विराटनगर । युवा तथा खेलकुदमन्त्री डिगबहादुर लिम्बूले खेल क्षेत्रको विकास र पर्यटन सँगसँगै अघि बढाउनुपर्नेमा जोड दिएका छन् । आइतबार नेपाल प्रेस युनियन मोरङको ११औँ अधिवेशन उद्घाटन कार्यक्रममा उनले यस्तो बताएका हुन् ।
“खेल क्षेत्रको पूर्वाधार विकाससँगै प्रतियोगिता गर्न सके खेल पर्यटनको विकास हुनसक्छ,” उनले भने ।
मुलुकलाई अस्थिरतातर्फ लैजानबाट रोक्न सरकार प्रतिबद्ध रहेको र भ्रष्टाचारमुक्त बनाउने कार्य सुरु भएको उनले उल्लेख गरे ।
भौतिक पूर्वाधार निर्माण गरेर १२ महिना खेलकुद प्रतियोगिता गर्न जरुरी रहेको उनले औँल्याए । उनले रोजगारी र युवा अवसर बढाउने सरकारले तयारी गरिरहेको बताए । “स्वरोजगार कोषमार्फत युवालाई उद्यमसँग जोड्नुपर्ने, उद्यमी बढाउने दिशामा मन्त्रालयले पनि काम गरिरहेको छ,” उनले भने ।
स्वरोजगारमूलक तालिम र प्रशिक्षण दिलाउने दिशामा मन्त्रालयले थप कम गर्ने मन्त्री लिम्बूले बताए । उनले भने, “देशको लागि खेल्ने खेलाडीको जीवन बिमा गर्ने योजना छ । नेपाली खेलाडीको वृत्तिविकास गर्ने योजना पनि छ ।“
उनले विराटनगरमा अन्तर्राष्ट्रिय क्रिकेट मैदानलाई पूर्णता दिन बजेट विनियोजन गरिएको जानकारी दिए ।
