काठमाडौं । नेपालमा प्रजनन् उमेरका २० प्रतिशत महिलाको गर्भ खेर गइरहेको सर्वेक्षणले देखाएको छ । 

स्वास्थ्य तथा जनसंख्या मन्त्रालयले सार्वजनिक गरेको नेपाल जनसांख्यिक तथा स्वास्थ्य सर्वेक्षण २०२२ (एनडीएचएस)ले यस्तो तथ्यांक देखाएको हो । यो पछिल्लो तीन वर्षयताको तथ्यांक हो । 

तथ्यांक अनुसार १५ देखि ४९ वर्ष उमेरका महिलामध्ये ८० प्रतिशतको जीवित शिशु जन्मिने र २० प्रतिशतको गर्भ खेर गइरहेको छ । 

गर्भ खेर जानेमध्ये पनि ९ प्रतिशतको आफैँ मिस्क्यारेज भएको, १० प्रतिशतले गर्भपतन गर्ने र एक प्रतिशतको मृत शिशु जन्मिने गरेको तथ्यांकमा उल्लेख छ । 

“बढ्दो गर्भावस्था क्रमसँगै गर्भपतन गर्नेको संख्या बढेको देखिन्छ, पहिलो गर्भावस्थामा गर्भपतन गर्नेहरू दुई प्रतिशत र पाँचौँ वा त्योभन्दा माथिका गर्भावस्थामा २९ प्रतिशतले स्वेच्छाले गरेका थिए,” प्रतिवेदनमा भनिएको छ ।