काठमाडौं । नेपाली राष्ट्रिय महिला फुटबल टिम आज बंगलादेशविरुद्ध दोस्रो मैत्रीपूर्ण फुटबलका लागि मैदानमा उत्रिँदै छ । नेपाली महिला टिम पछिल्लो ६ खेलयता जितविहीन छ । बंगलादेशविरुद्ध उत्रिँदा नेपाली टिम जितविहीन यात्रालाई तोड्ने लक्ष्यमा हुनेछ ।

एसियन गेम्सको तयारीका लागि दुई मैत्रीपूर्ण फुटबल खेल्न नेपाली टिम बंगलादेश पुगेको हो । पहिलो खेलमा नेपाली टिम बंगलादेशसँग १–१ को बराबरीमा रोकिएको थियो ।

खेलअघि नेपाली टिमका मुख्य प्रशिक्षक अनन्तराज थापाले नेपाली टिमले जितका लागि खेल्ने बताए ।

“हामी यहाँ जितका लागि आएका हौँ । पहिलो खेल बराबरी भयो । दोस्रो खेलमा भने हामी जित निकाल्ने प्रयास गर्नेछौँ । यहाँको मौसमले टिमलाई केही समस्या पारेको छ । तर, अहिले हामी यसमा घुलमिल भइसकेको महसुस भएको छ । दोस्रो खेलमा हामी आफ्नो उत्कृष्ट दिँदै अझ राम्रो नतिजा निकाल्ने प्रयास गर्नेछौँ,” थापाले भने ।

बंगलादेशको ढाकास्थित वीर श्रेष्ठ सहिद सिपाही मुस्तोफा कमल रंगशालामा नेपाली समयानुसार बेलुका ५ः१५ बजे खेल सुरु हुनेछ ।

नेपाली टिम पहिलो खेलमा इन्ज्युरी समयअघिसम्म १–० ले पछि परेको थियो । इन्ज्युरी समयमा सावित्रा भण्डारीले गोल गरेपछि नेपाली टिमको हार टरेको थियो ।