काठमाडौं । भवनमा आगलागी भएपछि आफ्नो नवजात शिशुलाई बचाउन तेस्रो तलाबाट शिशुलाई फाल्ने आमा अहिले चिनियाँ सामाजिक सञ्जालमा चर्चामा रहेकी छन् । 

चिनियाँ सामाजिक सञ्जाल वेइबो र टिकटक जस्तै एप डुयनमा यो भिडियो दशौं लाख पटक हेरिएको छ ।

यो घटना जुलाई ५ मा चीनको पूर्वी प्रान्त झेजियाङको वेन्झाउमा भएको हो । घरमा आगो लागेर बाहिर निस्कने अवस्था नभएपछि ती महिलाले यस्तो कदम चालेकी हुन् । आमाले बच्चा फाल्नुअघि तल रहेका मानिस बच्चालाई भुँइमा झर्न नदिन ठूलो कपडा समातेर उभिएका थिए ।

महिलाले बच्चालाई फालेपछि सोही कपडामा समातिएको थियो । त्यसको केही बरेपछि अग्नि नियन्त्रकले दुई महिलाको उद्धार गरेको बताइएको छ ।

यो भिडियोलाई लिएर कतिपयले ती आमाको साहसको सम्मान गरेका छन् भने, कतिले आमाले जोखिमपूर्ण कदम चालेको भनेका छन् ।

कतिले बास्केट जस्तो बनाएर डोरीबाट सजिलै फाल्नुपर्ने टिप्पणी गरेका छन् भने कतिले त्यसो गर्दा धुँवाले बच्चाको ज्यान जानसक्ने र आमाले राम्रै गरेको भनेका छन् ।