काठमाडौं । ललितानिवास जग्गा प्रकरणमा पक्राउ परेका सञ्चार मन्त्रालयका सचिव कृष्णबहादुर राउतको तर्फबाट पेस गरिएको रिट न्यायाधीश तिलप्रसाद श्रेष्ठको इजलासमा परेको छ ।

बुधबार राउतको तर्फबाट उषा कार्कीले सर्वोच्च अदालतमा दर्ता गराएको रिटमा आज प्रारम्भिक सुनुवाइका लागि पेसी तोकिएको हो ।

यसअघि, सोही प्रकरणमा पक्राउ परेका मीनबहादुर गुरुङ, सुधीरकुमार शाह र धर्मप्रसाद गौतमले आफूहरूलाई रिहा गर्नुपर्ने माग राखेर सर्वोच्चमा बन्दीप्रत्यक्षीकरणको रिटहरू दर्ता गराएका थिए । उक्त रिटमा प्रारम्भिक सुनुवाइपछि कारण देखाउ आदेश जारी गरिएको थियो ।

नेपाली प्रहरीको केन्द्रीय अनुसन्धान ब्युरो (सीआईबी)ले लिखित जवाफ पेस गरेपछि ती रिटहरूमा पेसी तोकिएको थियो । दोस्रो सुनुवाइमा न्यायाधीशद्वय डा. आनन्दमोहन भट्टराई र हरिप्रसाद फुयालको इजलासले गुरुङ, शाह र गौतमको रिटलाई ०७८ मा ललितानिवास प्रकरणमा आफूलाई पक्राउ नगर्न माग गर्दै १७ जनाले दर्ता गरेको रिट समेतलाई लगाउमा राखी सँगै सुनुवाइ गर्न आदेश दिएको छ ।

१७ जनाको उक्त रिटमा सुनुवाइ गर्दै न्यायाधीश ईश्वरप्रसाद खतिवडाको इजलासले ललितानिवास प्रकरणमा छानबिन भएको किर्ते मुद्दामा अनुसन्धानका लागि पक्राउ नगर्न आदेश दिएको थियो ।