काठमाडौं । नबिल बैंक लिमिटेडले ३९औँ वर्ष पूरा गरेको छ । नेपालको पहिलो निजी क्षेत्रको बैंकका रूपमा १२ जुलाई सन् १९८४ मा स्थापना भएको नबिलले आज ३९ वर्ष पुरा गरेको हो ।

३९औँ वार्षिकोत्सवकोे अवसरमा बुधबार बैंकका प्रमुख कार्यकारी अधिकृत ज्ञानेन्द्रप्रसाद ढुंगानाले बैंकलाई निरन्तर सर्वाेत्कृष्ट बनाएकोमा बैंकका कर्मचारीलाई धन्यवाद दिए ।

त्यस्तै बैंकप्रति अटुट भरोसा राखिएकोमा ग्राहकहरूलाई आभार प्रकट गर्दै यस्तै भरोसा राख्ने वातावरण बैंकले निरन्तर बनाउने प्रतिबद्धता व्यक्त गरे ।

सरल र ग्राहकमैत्री सेवा दिने क्रममा नबिल बैंकले प्रविधिको प्रयोगलाई मुख्य प्राथमिकता दिँदै आएको छ । सरलीकृत बैंकिङ सेवा विस्तार गर्ने क्रममा उच्चतम प्रविधिको प्रयोग गर्दै आएको नबिल बैंकले नेपालमा पहिलो पटक कम्प्युटराइज्ड बैंकिङको सुरु गरेको बताइएको छ ।

नबिलले सन् १९९४ मा पहिलो पटक एटीएम सर्भिसको सुरुआत गरेको थियो । त्यस्तैगरी सन् २०१२ मा पहिलो पटक मोबाइल बैंकिङको सुरु गरी मोबाइलबाट बैंकिङ सुविधा लिने प्रविधि भित्राइएको बैंकले जनाएको छ ।

नबिल बैंकले २०१४ मा अन्तर्राष्ट्रिय मास्टर कार्ड तथा डेबिट कार्डमा स्मार्ट चिप समावेश गरेको थियो । सन् २०१६ सालमा नबिलले कन्ट्याकलेस पेमेन्ट कार्ड नेपालमा पहिलो पटक ल्याएको थियो ।

नबिलले पछिल्लो पटक सन् २०२२ मा एन बैंकको सुरुआत गरेर नेपालमा पहिलो पटक नियो बैंकिङको सुरु गरेको थियो । नबिल बैंकको कुल निक्षेप तीन खर्ब ७८ अर्ब रुपैयाँ र कुल कर्जा तीन खर्ब ४० अर्ब पुगेको छ । नबिलले २० लाखभन्दा बढी सेवाग्राहीलाई सेवा प्रदान गर्दै आएको दाबी गरेको छ ।

नबिलले २६४ शाखा कार्यालय र २९८ एटीएम मेसिनहरूमाफर्त सेवा दिँदै आएको छ ।