काठमाडौं । नेपाली कांग्रेस केन्द्रीय समितिको बैठक आज बस्दै छ । अघिल्लो बैठकको ठिक एक वर्षपछि आज बैठक बस्न लागेको हो । 

विधानअनुसार कांग्रेसको केन्द्रीय समिति बैठक प्रत्येक दुई महिनामा बस्नुपर्ने हो । तर, कहिले सत्ता राजनीति मिलाउन त कहिले पार्टी नेता बालकृष्ण खाँण भ्रष्टचार मुद्दामा फसेपछि मिति तोकेर पनि बैठक सर्दै आएको छ । 

बिहान ९ बजे पार्टी पदाधिकारी र पूर्वपदाधिकारी बसेर केन्द्रीय कमिटी बैठकका एजेन्डालाई अन्तिम रूप दिइनेछ । 

यी हुन् बैठकका एजेन्डा
एक वर्षपछि बस्न लागेको बैठकको औपचािरक एजेन्डा पूर्ण रूपमा तय नभए पनि मोटामोटी एजेन्डाहरू तय भएको नेताहरू बताउँछन् । 

कांग्रेसको मंसिर ४ मा सम्पन्न भएको निर्वाचनको समीक्षा गरेकै छैन । गठबन्धन गर्दा पार्टी संगठनप्रति कार्यकर्ताको आशा र निराशाको विषयमा समीक्षा हुने देखिन्छ । यस्तै, पार्टीको नीति महाधिवेशनको विषय पनि अर्को मुख्य एजेन्डा भएको बताइएको छ । 

बैठकले असार २१ र २२ गते बसेको जिल्ला सभापतिहरूको भेला र सदस्यताको विषय, पटकपटक भएका कार्यसम्पादन समिति बैठकका निर्णयहरूको अनुमोदन पनि बैठकको विषय हुन् । 

एक वर्षपछि कांग्रेस केन्द्रीय समिति बैठक, यस्ता छन् एजेन्डा, खाँणको मुद्दामा सफ्ट बस्ने 

पार्टी केन्द्रीय समिति बैठकमा भ्रातृ तथा शुभेच्छुक संस्थाको तदर्थ समिति नबनेको र बनेका समितिहरूमा पनि धेरै असन्तुष्टिहरू छन् । यो विषयमा पनि प्रश्न उठ्ने देखिन्छ । यस्तै, विधानबमोजिम ६ महिनाभित्र गठन नभएको विभागको विषय, पार्टीको विभिन्न विषयमा अँगाल्नुपर्ने नीतिलगायतको विषयमा चर्चा हुनेछ ।

नयाँ दलको उदय र जनतामा पार्टीप्रतिको धारणा, पार्टीले बदलिएको परिस्थितिमा लिनुपर्ने नीतिलगायत विषयमा पनि छलफल हुने देखिन्छ । यसबाहेक समसामयिक राजनीतिक विषयमा पनि छलफल गर्ने तयारी कांग्रेसको छ ।