काठमाडौं । यही जुलाई १३ देखि श्रीलंकामा सुरु हुने इमर्जिङ टिम्स एसिया कपमा सहभागिता जनाउने नेपाली राष्ट्रिय क्रिकेट टिमको बिदाइ गरिएको छ ।

सोमबार काठमाडौंमा आयोजित एक कार्यक्रमबीच खेलकुदमन्त्री डिगबहादुर लिम्बूसहित क्यानका पदाधिकारीले नेपाली टिमलाई बिदाइ गरेका हुन् ।

कार्यक्रममा राष्ट्रिय क्रिकेट टिमका कप्तान रोहितकुमार पौडेलले इमर्जिङ कपलाई निकै महत्त्वका साथ हेरिएको बताए । जितको लक्ष्यका साथ खेल्ने उनले उल्लेख गरे ।

खेलाडीलाई सरकारले आवश्यक सहयोग गर्नुपर्ने उनले बताए । फुटबलमा भएजस्तो खेलाडी पलायनलाई रोक्नुपर्नेमा उनले जोड दिए ।

मुख्य प्रशिक्षक मोन्टी देशाईले पछिल्लो समय नेपाली टिमले धेरै अनुभव हासिल गरेको र इमर्जिङ कपमा राम्रो नजिता निकाल्ने विश्वास व्यक्त गरे ।

प्रतियोगिता जुलाई १३ देखि २३ तारिखसम्म हुनेछ । नेपाल समूह ‘बी’मा छ । यो समूहमा यूएई, पाकिस्तान ‘ए’ र भारत ‘ए’ पनि छन् । समूह ‘ए’मा श्रीलंका ‘ए’, बंगलादेश ‘ए’, अफगानिस्तान ‘ए’ र ओमान छन् ।

नेपालले जुलाई १४ मा पाकिस्तान ‘ए’सँग पहिलो खेल खेल्नेछ । नेपालले दोस्रो खेलमा जुलाई १७ मा भारत ‘ए’को सामना गर्नेछ । समूह चरणको अन्तिम खेलमा नेपालले जुलाई १९ मा यूएईसँग खेल्नेछ ।

जुलाई २१ मा सेमिफाइनल खेल हुनेछ । फाइनल खेल जुलाई २२ मा हुने तय छ ।