काठमाडौं । संस्कृति, पर्यटन तथा नागरिक उड्डयन राज्यमन्त्री सुशीला सिर्पाली ठकुरीले प्रधानमन्त्रीको अभिव्यक्तिलाई राजनीतिक दाउपेच बनाएर समाज निर्माण हुन नसक्ने बताएकी छन् । सोमबार प्रधानमन्त्रीको सरकारी निवास बालुवाटारमा आयोजित पुष्पलाल राष्ट्रिय पुरस्कार—२०८० समर्पण समारोहमा उनले यस्तो बताएकी हुन् ।

असार १८ गते दिएको अभिव्यक्तिलाई दुई दिनपछि सञ्चारमाध्यममा ल्याउने र राजनीतिक दाउपेच बनाउने काम भएको आरोप उनले लगाइन् । उनले अहिले नेपालको राजनीति कलंकित बनिरहेको उल्लेख गरिन् ।

सुन्दर समाजको परिकल्पना गरेर अघि बढ्दा ठूला बाधा–अड्चन आएको उनको भनाइ छ । “कहीँ न कहीँ राजनीति कलंकित हुँदै छ, आज कहीँ न कहीँ राजनीतिलाई सफा र पारदर्शी बनाऊँ भन्दा आज सहमति जुट्न सकेको छैन । हामीले राजनीतिलाई कतै न कतै दाउपेच र लेनदेनको खेल पनि बनाएका छौँ,” उनले भनिन्, “समाजमा बडो दुःखद परिदृश्यहरू आइपरेका छन् । आज हामी सुन्दर समाजको परिकल्पना गरेर अघि बढ्दा ठूला बाधा–अड्चन आएका छन् । राजनीति सहजै सफा हुन सक्दैन भन्ने कुरा देखिएको छ । १८ गते बोलेको कुरालाई दुई दिनपछि मिडियामा ल्याउने, अनि त्यसलाई हामीले राजनीतिमा एउटा दाउपेचको कुरा गर्दा स्वच्छ समाज निर्माण गर्न सक्यौँ कि सकेनौँ ? पुष्पलालले परिकल्पना गरेको समाज निर्माण गर्न साँच्चै सक्छौँ कि सक्दैनौँ भन्ने कुराको चुनौती आइपरेको छ ।”

मन्त्री ठकुरीले राजनीति सहजै सफा हुन नसक्ने स्थिति देखिएको बताइन् ।