काठमाडौं । फ्रान्सका फरवार्ड काइलियन एमबाप्पेले आफ्नो क्लब पेरिस सेन्ट जर्मन (पीएसजी) लाई ‘विभाजनकारी’को संज्ञा दिएका छन् ।

क्लबसँगको सम्झौतालाई लिएर चर्चामा रहेका एमबाप्पेले फ्रान्स फुटबल म्यागाजिनसँग पीएसजीलाई विभाजनकारी भनेका हुन् ।

पीएसजीका उच्च गोलकर्तासमेत रहेका २४ वर्षीय एमबाप्पे र क्लबबीच आगामी वर्षसम्मको सम्झौता छ । यसकारण क्लबले सम्झौता नवीकरणका लागि दबाब दिँदा एमबाप्पेले भने सम्झौता नवीकरण नगर्ने बताएका छन् ।

“मलाई लाग्छ पीएसजीबाट खेल्दा यसले धेरै सहयोग गर्दैन, किनकी यो विभाजनकारी टिम हो,” रिर्पोटको दाबी गर्दै बीबीसीले लेखेको छ ।

आगामी वर्ष सम्झौता समाप्त हुने भए पनि एमबाप्पे नवीकरणको पक्षमा नरहँदा पीएसजीका अध्यक्ष नासेर अल–खेलाइफी पनि उनलाई ‘फ्री ट्रान्सफर’ मा जान दिने पक्षमा देखिँदैनन् ।

पीएसजीबाट पाँचपटक लिग वानको उपाधि जितेका एमबाप्पे सन् २०१७ मा मोनाकोबाट आएका थिए । गत सिजन पीएसजीले लिग वानको उपाधि जित्दा एमबाप्पेले सबैखाले प्रतियोगितामा गरी ४१ गोल गरेका थिए । तर, गत सिजन पनि पीएसजीले क्लबको सबैभन्दा महत्त्वपूर्ण लक्ष्यमा रहेको च्याम्पियन्स लिगको उपाधि जित्न भने सकेन । गत सिजन पीएसजी च्याम्पियन्स लिगको अन्तिम–१६ बाट नै बाहिरिएको थियो । 

“हामीले गर्न सक्ने जति गर्‍यौँ । हामीले टिम बनाउने मानिसहरू र यो क्लब बनाउने मानिसहरूसँग छलफल गर्न आवश्यक छ,” एमबाप्पेले भने ।

पीएसजीले हालैमात्र स्पेनका पूर्वमुख्य प्रशिक्षक लुइस एनरिकेलाई टिमको प्रशिक्षण जिम्मेवारी सुम्पिएको छ । एनरिकेले यसअघिका मुख्य प्रशिक्षक रहेका क्रिस्टोफर गाल्टियरको स्थान लिएका हुन् ।

पीएसजीले यसअघि अर्जेन्टिनाका कप्तान ३६ वर्षीय लियोनल मेसीलाई मेजर लिग सकर (एमएलएस) क्लब इन्टर मियामीका जान फुकुवा गरिसकेको छ । यता, क्लबका अर्का फरवार्ड नेइमारको भविष्य पनि अन्योलमा देखिएको छ ।