काठमाडौं । सत्तासाझेदार जनता समाजवादी पार्टीका प्रमुख सचेतक प्रदीप यादवले नेकपा (एमाले)ले संसद्मा प्रधानमन्त्री पुष्पकमल दाहाल प्रचण्डलाई सम्बोधन गर्न दिनुपर्ने बताएका छन् । प्रधानमन्त्रीलाई सम्बोधन गर्न समेत नदिएर संसद अवरुद्ध गर्ने एमालेको कामले कसैलाई पनि फाइदा नपुग्ने उनको भनाइ छ ।

आइतबार संघीय संसद् परिसरमा सञ्चारकर्मीहरुले राखेका जिज्ञासाको जवाफ दिने क्रममा प्रमुख सचेतक यादवले एमालेले निरन्तर संसद् अवरुद्ध गरे मुलुक झनै संकटमा फस्दै जाने अवस्था आएको जिकिर समेत गरे । संसद् अवरुद्ध गरेर एमालेले सिंगो मुलुकलाई नै घाटामा पार्ने काम गर्न नहुने उनको भनाइ छ ।

प्रमुख सचेतक यादवले प्रधानमन्त्रीले सबैलाई चित्त बुझाउने गरी संसद्मा आफ्नो विवादास्पद अभिव्यक्तिबारे जवाफ दिने भएकाले एमालेले त्यसमा अवरोध गर्न नमिल्ने पटकपटक दोहोर्‍याए ।

“विज्ञप्तिको कुरा होस् वा सम्माननीय प्रधानमन्त्रीजीको जुन अभिव्यक्तिको कुरा आइराखेको छ, संसद्मा जब प्रधानमन्त्रीजीले भनिसक्नु भएको छ कि म संसद्मा कुरा राख्छु । र, मैले कुरा राखिसकेपछि सबैको चित्त बुझ्छ भने उहाँको विश्वास छ,” उनले भने, “त्यसकारण संसद्मा त कुरा सुन्नु पर्छ । अब संसद्मा कुरा नसुनिकन विज्ञप्तिको कुरा गरेर कसलाई फाइदा हुन्छ ? बताउनुस् त । प्रमुख प्रतिपक्षलाई फाइदा हुन्छ कि सत्ता पक्षलाई फाइदा हुन्छ ? घाटा त मुलुकलाई भयो । घाटा त नागरिकलाई हो ।”

प्रमुख सचेतक यादवले संसद अवरुद्ध पार्नका लागि जनताले मत नदिएकोतर्फ पनि एमालेको ध्यानाकर्षण गराए ।