काठमाडौं । नेपाली कांग्रेसका जिल्ला सभापतिहरूको बैठकमा केन्द्रीय सभापति शेरबहादुर देउवाको खोजी भएको छ । 

बिहीबार र शुक्रबार दुई दिन पार्टी केन्द्रीय कार्यालय सानेपामा बसेको जिल्ला सभापतिहरूको बैठकमा पार्टी सभापति शेरबहादुर देउवा उपस्थित भएनन् । तर, जिल्ला सभापतिहरूले सभापति देउवा किन उपस्थित नभएको भन्दै खोजी भएको हो । 

बैठकमा बोल्ने जिल्ला सभापतिहरूले प्रश्न गरेपछि महामन्त्री विश्वप्रकाश शर्माले आफूहरूले सभापतिलाई जानकारी दिएरै बैठक बोलाएको जवाफ दिएका थिए । 

“यत्रो कार्यक्रममा पार्टी सभापति नआएको कि नबोलाएको ? सभापतिसँग साक्षात्कार गर्न कसले रोक्यो भनेर डोटीका सभापतिसहित पश्चिमका जिल्लाहरूको सभापतिले कुरा उठाउनुभयो,” बैठकमा सहभागी एक नेताले भने । 

सर्लाही जिल्ला सभापति सुरेन्द्रप्रसाद सिंहले बाह्रखरीसँग कुराकानी गर्दै आफू भोलि सभापति भेट्न उनकै निजी निवास जाने तयारीमा रहेको बताए । 

आफू केन्द्रीय कार्यालयबाट आएको परिपत्रअनुसार बैठकमा उपस्थित भएको भन्दै उनले सभापति आएको भए कुरा राख्दा अझ प्रभावकारी हुने थियो भन्ने प्रतिकृया दिए । 

“पार्टीको परिपत्रको आधारमा म यो बैठकमा आएको हुँ । सभापति ज्यू किन आउनुभएन थाहा भएन तर, आउनुभएको भए राम्रो हुन्थ्यो । भित्र कुरा पनि उठ्यो,” उनले भने, “म भोलि सभापति भेट्न उहाँकै निवास जाने तयारीमा छु ।” 

जिल्ला सभापतिहरूलाई सदस्यता वितरण ‘डिजिटलाइज’ गर्न भन्दै बैठक बोलाइएको हो । बैठकमा उनीहरूलाई जिल्लाको अवस्थाको रिपोर्ट लिएर उपस्थित हुन पनि परिपत्रमा भनिएको थियो । 

सोही बमोजिम सम्भव भएका जिल्ला सभापतिहरू भौतिक र संम्भव नभएका जिल्ला सभापतिहरूका प्रतिनिधि र त्यो पनि नभए जुममार्फत जोडिएका थिए ।

चितवन जिल्ला सभापति राजेश्वर खनालले सभापति पाँच मिनेट उपस्थित भएर शुभकामाना दिएको भए कार्यक्रमको औचित्य थप पुष्टि हुने धारणा राखे । 

“५०, ५२ जिल्ला सभापतिहरू आउनुभएको छ । एक दर्जन प्रतिनिधिहरू उपस्थित हुनुहुन्छ । अरू अनलाइनबाट जोडिनुभएको छ भने, यस्तो खालको बैठकमा केन्द्रीय सभापति आएर शुभकामना राख्दिनुभएको भए हामी आभारी हुने थियौं भनेर मैले बोलेको हो,” खनालले बाह्रखरीसँग भने । 

बिहीबारको बैठकमा पनि सभापति देउवाको खोजी भएको थियो । रूपन्देही सभापति रामकृष्ण खाँण, स्याङ्जा सभापति राजु थापा, संखुवासभा सभापति दीपक खड्काले देउवाको खोजी गरेका थिए । 

उनीहरूले सभापतिहरूको भेला गरेर केन्द्रीय सभापति नबोलाएर एकलौटी कार्यक्रम गरेको हो भन्दै प्रश्न गरेका थिए । नेपाली कांग्रेसको विधानले महामन्त्रीलाई केन्द्रीय कार्यालय र संगठनको कामकारबाही अघि बढाउने अधिकार दिएको छ । 

विधानको धारा २७ मा महामन्त्रीको काम कर्तव्य र अधिकारसम्बन्धी व्यवस्था छ । जहाँ महामन्त्रीहरूको दर्जन अधिकार सूची स्पष्ट लेखिएको छ । २७ को ९ मा नेपाली कांग्रेसको सदस्यताबारे धारा ४ को उपधारा ९ बमोजिमको कार्य गर्ने गराउने अधिकार महामन्त्री रहने भनि स्पष्ट विधानले लेखेको छ । 

पार्टी महामन्त्री विश्वप्रकाश शर्माले भने सभापति शेरबहादुर देउवासँगको छलफल पश्चात् नै बैठक राखिएको जानकारी दिए । पार्टी सभापतिसँग केही विषयमा फरक मत रहे पनि विधान संवत् पाएको अधिकार महामन्त्रीद्वयले प्रयोग गरेको भनाइ शर्माको छ । 

“हो सभापतिसँग कतिपय विषयमा फरक मत हुँदाहुँदै पनि यस प्रकारको भेला जानकारी नदिइकन गरियो भन्ने कुरा बेकारको हो,” महामन्त्री शर्माले भने, “विगतमा होटेलमा भेला गर्ने प्रचलन थियो अहिले पार्टी कार्यालयमा भइरहेको छ । यसमा आशंका गर्नुपर्ने कारण छैन ।” 

नेपाली कांग्रेस केन्द्रीय कार्यालयको आयोजनामा असार २१ गतेदेखि सुरु भएको जिल्ला सभापतिहरूको दुई दिने बैठक १४ बुँदे आन्तरिक प्रतिवद्धता पारित गर्दै आज सम्पन्न भएको छ ।