काठमाडौं । चीनमा खानेकुरा चोरेर भागेका आफ्ना छोरालाई बुवाले सिकाएको संस्कारको भिडियो एक कुशल अभिभावकत्वको उदाहरण भन्दै अहिले चर्चामा छ । सिन्ह्वाको रिपोर्ट अनुसार उक्त भिडियो सीसीटीभी क्यामेरामा रेकर्ड भएको हो ।

भिडियोमा सांघाईको एक स्थानीय खाजाघरमा बालकले चामलबाट बन्ने सामान्य परिकार समातेको देखिन्छ । चिनियाँ सामाजिक सञ्जाल वेइबोमा पोस्ट गरिएको भिडियोमा करिब पाँच वर्षको जस्तो देखिने ती बालकले वरपर कोही नदेखिँदा खाजाघरको काउन्टरबाट उक्त खानेकुरा समात्छन् । त्यसपछि ती बालक भाग्छन् ।

अनि, उनका बुवाले छोरालाई काउन्टरमा फिर्ता ल्याएको देखिन्छ । त्यसका मालिक काउन्टरमा पुग्दा बालकका बुवाले घटनाबारे बताउँछन् । र, उक्त खानेकुराको पैसा दिन्छन् ।

भोजनालय सञ्चालकले सानो बालक र सामान्य खानेकुराका लागि पैसा दिन नपर्ने बताउँछन् । तर, अरूको सामान यत्तिकै समात्न नमिल्ने भन्दै ती बालकका बुवाले छोरालाई माफी माग्न भन्छन् ।

तर, केही असहज महसुस गरिरहेको देखिने ती बालकले माफी माग्दैनन् । त्यसै बेला उनका बुवाले निहुरिएर माफी माग्छन् र फेरि बालकतिर हेर्छन् । बुवाले माफी मागेको देखेपछि बालकले पनि ‘मलाई माफ गर्नुहोस्’ भन्छन् र निहुरिन्छन् ।

यो भिडियोले कसरी आफ्ना बालबालिकालाई संस्कार सिकाउन सकिन्छ र कुशल अभिभावक बन्न सकिन्छ भन्ने देखाएको भन्दै चर्चा पाएको छ ।

केही दिनअघि पूर्वी चीनमा एक बुवाले आफ्नो आठ वर्षीय छोराले कम नतिजा ल्याएकामा पनि पुरस्कृत गरेको भिडियाले चर्चा पाएको थियो ।

यस्तै, केही महिनअघि दक्षिणी चीनमा छिमेकीको कार ‘स्क्र्याच’ गर्ने छोरालाई पैसा दिएर माफी माग्न लगाएको भिडियोले पनि चर्चा पाएको थियो ।