काठमाडौं । प्रतिनिधिसभाका सभामुख देवराज घिमिरेले संसद्लाई प्रभावकारी बनाउने गरी भूमिका निर्वाह गर्न राजनीतिक पार्टीहरूलाई आग्रह गरेका छन् । संसद् जनअपेक्षाअनुसार चल्न नसकेको आम अनुभूति भइरहेको उनले उल्लेख गरे ।
६५औँ संसद् दिवसको अवसर पारेर शनिबार काठमाडौंमा आयोजित एक कार्यक्रममा उनले संसद् जनप्रतिनिधिको सर्वोपरी संस्था भएकाले यसलाई प्रभावकारी बनाउने विषयमा पूर्वसंसद् क्लबभित्र छलफल गर्न उपयुक्त हुने धारणा राखे ।
राष्ट्र र जनताको आवश्यकताअनुसार कानुन निर्माण गर्ने, भएका कानुनलाई सरकारले प्रभावकारी ढंगले कार्यान्वयन गर्दै जानुपर्नेमा उनले जोड दिए ।
कार्यक्रममा राष्ट्रियसभाकी उपाध्यक्ष उर्मिला अर्यालले प्रतिनिधिसभामा प्रत्यक्षतर्फ कम्तीमा ३३ प्रतिशत महिला निर्वाचित हुने व्यवस्था गरेर जानुपर्ने बताइन् । उनले समानुपातिकमा एकपटक ल्याएका महिलाको अनुभवलाई प्रयोगमा ल्याउने गरी फेरि सांसद बनाउने काम गर्न पनि राजनीतिक दलहरूलाई आग्रह गरिन् ।
उपाध्यक्ष अर्यालले तराई–मधेसमा डोमलगायत जातिमाथि भएको उत्पीडन कम हुने गरी कानुन निर्माण गर्नुपर्नेमा जोड दिइन् ।
