विराटनगर । उच्च अदालत विराटनगरले कोसी प्रदेशका सामाजिक विकासमन्त्री वुद्धिकुमार राजभण्डारीलाई आफैँ उपस्थित भएर लिखित जवाफ पेस गर्न आदेश गरेको छ ।

बुधबार उच्चका न्यायाधीशद्वय सत्यमोहन जोशी थारु र किरणकुमारी गुप्ताको इजलासले मन्त्री राजभण्डारीविरुद्ध अदालतको अपहेलनासम्बन्धी मुद्दामा असार २० गते बिहान ११ बजे अदालतमा उपस्थिति भई लिखित जवाफ पेस गर्न आदेश दिएका हुन् ।

मंगलबार अधिवक्ता उद्धवचन्द्र घिमिरे र रजिस्ट्रार जितेन्द्रबाबु थपलियाले उच्च अदालत विराटनगरमा अपहेलना मुद्दामा रिट निवेदन दायर गरेका थिए ।

निवेदक उच्च अदालतका रजिष्टार जितेन्द्रबाबु थपलियाको तर्फबाट वरिष्ठ अधिवक्ताहरू हेमराज पराजुली, डिल्लीबहादुर कार्की, हेमराज पन्त, अधिवक्ताहरू शिवप्रसाद आचार्य, देवेन्द्र कोइराला र विश्वराम भट्टराईले पैरवी गरेका थिए ।

न्यायाधीशले पैसा खाएर स्टेअर्डर दिएको विवादित अभिव्यक्ति दिएपछि राजभण्डारीविरुद्ध उच्च अदालतमा रिट निवेदन दर्ता मुद्दा भएको हो । गत असार १० गते विराटनगरस्थित शिक्षादीप कलेजले आयोजना गरेको एक कार्यक्रममा मन्त्री राजभण्डारीले उच्च अदालतले प्रदेश खेलकुद विकास बोर्डका सदस्य सचिवले पैसा दिएकै भरमा न्यायाधीशले आदेश गरेको आरोप लगाएका थिए ।

न्यायाधीशको नाम किटेर संविधान र कानुनको उल्लंघन गर्दै मन्त्रीले दिएको अभिव्यक्ति न्यायालयमाथि घृणा फैलाउने उद्देश्यले प्रेरित भएको दाबी निवेदनमा गरिएको थियो ।

कोसी प्रदेश सरकारको गत जेठ ३ गते बसेको मन्त्रिपरिषद् बैठकले प्रदेश खेलकुद विकास बोर्डका सदस्य सचिव हंसराज वाग्लेलाई बर्खास्त गर्ने निर्णय गरेको थियो ।
अदालतको अवहेलना गरेको ठहर भए एक वर्षसम्म कैद वा १० हजार रुपैयाँसम्म जरिबाना वा दुवै सजाय वा अरू कुनै आदेश हुन सक्ने प्रावधान छ ।