काठमाडौं । सरकारले ल्याएको बजेटको विपक्षमा उभिएको जनमत पार्टी सरकारको समर्थन कायम राख्ने वा फिर्ता लिने विषयमा अनिर्णीत बनेको छ ।

बुधबार बसेको पार्टी संसदीय दलको बैठकबाट बजेटको विपक्षमा उभिने निर्णय गरेको जनमतले विपक्षमा मतदान समेत गरिसकेको छ । तर, सरकारलाई दिएको समर्थन फिर्ता लिने वा कायम राख्ने भन्ने विषयमा भने अझैं अलमलमा छ ।

पार्टी उपाध्यक्ष तथा पूर्वखानेपानी मन्त्री अब्दुल खानले बाह्रखरीसँग सरकारमा रहेको माओवादी, नेपाली कांग्रेसलगायत दलले अब खेल्ने भूमिकाअनुसार समर्थनको विषयमा निर्णय गरिने जानकारी दिए ।

“हामीले प्रदेशमा पनि सम्मानजनक अवसर पाएका छैनौं । केन्द्रमा पनि सरकार छाडिसकेका छौँ । बजेटको विषयमा पनि हाम्रो स्पष्ट धारणा छ,” खानले बाह्रखरीसँग भने, “यसको मतलव अहिले हाड एण्ड फास्ट हामी समर्थनको विषयमा निर्णयमा पुग्दैनौं । संवादलाई अघि बढाउँछौँ र निर्णयमा पुग्छौँ ।”

केही समय अघि पार्टी सरकारकबाट बाहिरिए पनि प्रधानमन्त्री पुष्पकमल दाहाल 'प्रचण्ड' नेतृत्वको सरकारलाई दिएको समर्थन भने फिर्ता लिएको छैन । पार्टी अहिलेपनि गठबन्धन भित्रको एक घटक हो ।

तर, गठबन्धनको एक घटक भएपनि पार्टी आगामी आर्थिक वर्षको बजेट पास गराउने पक्षमा उभिएन । बजेटलाई गरिबमारा र जनतामाराको संज्ञा दिएको पार्टीले सरकारलाई दिएको समर्थन के हुन्छ भन्ने खुलाएको छैन ।