काठमाडौं । ब्रान्डन म्याकमुलमको शतकप्रेरित स्कटल्यान्डले आईसीसी क्रिकेट विश्वकप छनोटमा ओमानविरुद्ध ३२१ रनको लक्ष्य प्रस्तुत गरेको छ ।

आइतबार जिम्बाब्वेको बुलावाओ एथ्लेटिक क्लबमा टस हारेपछि ब्याटिङमा आएको स्कटल्यान्डले निर्धारित ५० ओभरमा सबै विकेट गुमाएर ३२० रनको योगफल खडा गर्यो ।

स्कटल्यान्डका म्याकमुलमले १३६ रन बनाए । उनले १२१ बलमा १४ चौका र तीन छक्का प्रहार गरे । कप्तान रिची बेरिंटनले ६० रन बनाए । टोमस म्याकिन्टोसले ३२, म्याथ्यु क्रसले २७, मार्क वाटले २५ र मिचेल लियस्कल ११ रन बनाए ।

ओमानका बिलाल खानले पाँच विकेट लिए । १० ओभर बलिङ गरेका खानले दुई मेडन राख्दै ५५ रन खर्चिए । फयाज बटले दुई र जय ओडेड्राले एक विकेट लिए ।

छनोटको समूह ‘बी’मा रहेको स्कटल्यान्डको यो तेस्रो र ओमानको चौथो खेल हो ।

छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

प्रत्येक समूहबाट शीर्ष तीन टिम सुपर सिक्समा प्रवेश गर्नेछन् । सुपर सिक्सबाट शीर्ष दुई टिम यसै वर्ष भारतमा हने एकदिवसीय विश्वकपका लागि छनोट हुनेछन् ।