काठमाडौं । भारतमा आजदेखि सुरु हुन लागेको साफ च्याम्पियनसिप फुटबलको पहिलो खेलमा साविक उपविजेता नेपाललाई आमन्त्रित टिम कुवेतले चुनौती प्रस्तुत गर्दै छ ।

प्रतियोगिताको समूह ‘ए’मा रहेको नेपाल कुवेतविरुद्ध मैदान उत्रिँदा साविक उपविजेताको हैसियत जोगाउने लक्ष्यमा हुनेछ । फिफा वरीयतामा नेपालभन्दा निकै माथि रहेकाले पनि कुवेतविरुद्धको नतिजा सेमिफाइनल प्रवेशका लागि महत्वपूर्ण छ । यो समूहमा नेपाल र कुवेतसँगै साविक विजेता भारत र पाकिस्तान पनि छन् ।

यसपटक दुई बलिया टिम कुवेत र लेबनान पनि आमन्त्रित टिमको रुपमा थपिएकाले यस संस्करण अझ प्रतिस्पर्धात्मक हुने अनुमान छ । नेपाली टिमका कप्तान किरण चेम्जोङले पनि यस संस्करणको उपाधि जित्ने दाबी गर्न नसकिने प्रतिकृया दिएका थिए ।

“यसपटक दुई नयाँ टिम थपिएकाले अझ धेरै चुनौती छ । उपाधि जित्छौँ भन्न सक्दिनँ । योजनाअनुसार एक परिवार भएर प्रतिस्पर्धा गर्नेछौँ । सुखद् नजिताका लागि लड्छौँ । उपाधि जित्छौँ भनेर अहिले भन्न सकिँदैन,” कप्तान किरणले भने ।

साफ च्याम्पियनसिप सुरु भएकै तीन दशक पूरा भइसक्यो । सन् १९९३ देखि सुरु भएको प्रतियोगिताका हालसम्म १३ संस्करण सफलतापूर्वक सम्पन्न भइसकेका छन् ।

च्याम्पियनसिपको हरेक संस्करणमा नेपाल दाबेदारको रूपमा गनिन्छ । तर, च्याम्पियनसिपको सुरुआतदेखि नै दाबेदारमा उभिएको नेपालले हालसम्म उपाधि घर ल्याउन सकेको छैन । यसअघि, सन् २०२१ मा माल्दिभ्समा भएको १२औँ संस्करणको फाइनल पुग्नु नै च्याम्पियनसिपको ३० वर्षे इतिहासमा नेपालले पाएको सबैभन्दा ठूलो सफलता हो ।

यसबाहेक नेपाल एकपटक तेस्रो, दुई पटक चौथो स्थान (सन् १९९५, १९९९) र तीनपटक (२०११, २०१३ र २०१८) सेमिफाइनल प्रवेश गरेको छ ।

च्याम्पियनसिपमा यसपटक दुई आमन्त्रितसहित आठ टिमले प्रतिस्पर्धा गर्दै छन् । दक्षिण एसियाली क्षेत्रीय सहयोग संगठन (सार्क) मा सात टिम रहे पनि यसपटक फिफाको प्रतिबन्धका कारण श्रीलंका प्रतियोगितामा सहभागिताको अवसरबाट वञ्चित छ ।

सहभागी आठ टिम एक समूहमा चार टिम रहनेगरी दुई समूहमा विभाजित छन् । समूह ‘ए’मा नेपालसँगै प्रतियोगिताको सर्वाधिक सफल तथा साविक विजेता भारत, पाकिस्तान र कुवेत छन् । साविक विजेता, उपविजेता र बलियो कुवेतको उपस्थितिलाई हेर्दा यो समूहलाई ‘ग्रुप अफ डेथ’ पनि मान्न सकिन्छ । समूह ‘बी’ मा लेबनान, माल्दिभ्स, भुटान र बंगलादेश छन् ।

भारतको बेंगलुरुस्थित श्री कान्तिरभा रंगशालामा हुने खेल नेपाली समयअनुसार दिउँसो ३ः४५ बजेदेखि सुरु हनेछ ।