धादिङ । जिल्ला प्रहरी कार्यालय धादिङले मृग मारेको आरोपमा बन्दुकसहित पक्राउ परेका चारजनालाई सार्वजनिक गरेको छ । आज पत्रकार सम्मेलन गरी पक्राउ परेका चारजनालाई सार्वजनिक गरिएको हो ।

पक्राउ पर्नेमा धादिङको ज्वालामुखी गाउँपालिका वडा नम्बर ४ का ६० वर्षीय पदम सिलवाल, सोही स्थानका ३० वर्षीय राजेन्द्र शाक्य, २८ वर्षीय आशिष गुरुङ र ज्वालामुखी गाउँपालिका वडा नम्बर ६ का १९ वर्षीय सुमन गुरुङ रहेका जिल्ला प्रहरी कार्यालय धादिङका प्रहरी उपरीक्षक गौतम मिश्रले जानकारी दिए ।

ज्वालामुखी गाउँपालिका ४ धौखोला, दोभानटारस्थित रामकृष्ण श्रेष्ठको घरमा गंगा गुरुङले सञ्चालन गरेको खाजा पसलमा जंगली मृग मारी हतियारसहित खाजा खाइरहेको गोप्य सूचनाको आधारमा खटिएको प्रहरीको टोलीले उनीहरुलाई पक्राउ गरेको हो ।

पक्राउ परेकाका साथबाट प्रहरीले मृगको घाँटीसहित एक किलो ३५० ग्राम रौ, आलो छाला एक थान, हड्डीसहितको आलो मासु एक किलो ९२५ ग्राम, ४ फिट ३.५ इन्च लम्बाई भएको बरुवा बन्दुक दुई थान, ३.५ इन्च लम्बाई भएको बरुवा बन्दुक एक थान र १६ इन्च लम्बाई भएको धारिलो खुकुरी १ थान बरामद गरिएको प्रहरीले जनाएको छ ।

पक्राउ परेकालाई धादिङ जिल्ला अदालतबाट हातहतियार, खरखजना मुद्दामा सात दिन म्याद थप गरी अनुसन्धान भइरहेको प्रहरीले जनाएको छ ।