काठमाडौं । उपप्रधान एवं गृहमन्त्री नारायणकाजी श्रेष्ठले सिर्सिया नदीको प्रदूषण रोक्न माग गर्दै काठमाडौंको माइतिघरमा धर्नामा बसेका स्थानीयलाई छलफलका लागि सिंहदरबार आउन आग्रह गरेका छन् । 

बुधबार धर्नास्थल माइतिघर पुगेर मन्त्री श्रेष्ठले आन्दोलनरत पक्षले राखेका विषयमा सरकार सकारात्मक रहेको भन्दै छलफलमा बसेर निष्कर्षमा पुग्नुपर्ने बताए । 

उनले सिर्सिया नदीलाई स्वच्छ राख्नुपर्ने विषयलाई सम्बोधन गर्न तत्कालीक र दीर्घकालीन समाधानका लागि सरकार गम्भीर रहेको बताए । उनले सिर्सियाबासीको समस्या राज्यको पनि समस्या भएकाले सरोकारवाला मन्त्रालयहरुसँग पनि छलफल गरिने प्रतिवद्धता जनाए । 

कारखानाबाट निस्किएको फोहर सिधै मिसाउँदा नदीमा प्रदूषण बढेको भन्दै उनीहरुले काठमाडौंमा धर्ना दिँदै आएका छन् । उनीहरुले सिर्सिया नदीको पानी भरिएको बोतल गृहमन्त्रीलाई देखाएका छन् ।

बुधबार नै गृहमन्त्री श्रेष्ठले माइतिघरमा सहकारी पीडितको आन्दोलनमा पुगेर यो विषयको समाधान खोज्ने प्रतिवद्धता जनाए । उनले सहकारीका बचतकर्तामाथि न्याय हुने गरी सरकारले उपयुक्त कदम चाल्ने आश्वासन दिए । 

मन्त्री श्रेष्ठले सहकारीका बचतकर्ताको समस्याका बारेमा सरकार जानकार रहेको र समाधानका लािग समिति गठन गरिसकेको बताए । पीडितको समस्या समाधान हुने उनको दाबी छ ।