काठमाडौं । अर्थमन्त्री डा प्रकाशरण महतले विद्युतीय गाडीको फाइदा उपभोक्ताले भन्दा बढी बिक्रेताले उठाएको बताएका छन् ।

प्रतिनिधिसभामा बोल्दै अर्थमन्त्री महतले विद्युतीय गाडीमा बढी किलोवाटको लागि बढी नै कर लगाएको र यसलाई समयअनुसार दर लगाइएको दाबी गरे ।

महतले ५० देखि १०० किलोवाटसम्मका विद्युतीय गाडीमा कर बढाएका थिए भने १०० किलोवाटभन्दा बढीको करको दर घटाएका थिए ।

महतले अहिले पनि पेट्रोलियम पदार्थबाट चल्ने गाडीभन्दा विद्युतीय गाडीलाई छुट बढी दिएको भन्दै विद्युतीय गाडी चढेका उपभोक्ता पेट्रोलमा सिफ्ट नहुने बताए ।

“विद्युतीय गाडीमा छिमेकी देशको तुलनामा नेपालले धेरै नै करमा सहुलियत दिएको छ,” महतले भने, “केही विद्युतीय गाडीमा कर बढाउनुपर्ने नै थियो । जसमा केही बिक्रेताले असन्तुष्ट भएर बाहिरी दबाब बनाउने काम गरेका छन् ।”

महतले आफूले बजेटमा भ्याटको दायरा बढाउने काम गरेको बताए । यस्तै, विद्युतीय गाडी बजेट अगाडि छुटेर आएकोमा व्यापारीले अनुमानमा आधारित भएर ल्याएको भन्दै यसको जिम्मा आफूले लिन नसक्ने बताए ।