काठमाडौं । ज्लाटन इब्राहिमोभिचले ४१ वर्षको उमेरमा फुटबल करियरबाट सन्न्यासको घोषणा गरेका छन् ।

स्वीडेनका फरवार्ड इब्राहिमोभिचले आइतबार राति एसी मिलानले भेरोनाविरुद्ध ३–१ को जित निकालेपछि सन्न्यासको घोषणा गरेका हुन् । सन् २०२२–२३ को सिजन अधिकांश समय चोटसँग जुधिरहेका इब्राहिमोभिचले सन्न्यासपछि मिलानलाई अवसरका लागि धन्यवाद दिए ।

उनले सान सिरोमा समर्थक, क्लबका अधिकारी र सहकर्मीहरूबाट अद्भुत बिदाइ पाएका थिए ।

“रंगशालाभित्र धेरै स्मरण र भाव छन् । म पहिलोपटक यहाँ आउँदा तपाईंहरूले खुसी दिनुभयो । दोस्रोपटक आउँदा माया दिनुभयो,” इब्राहिमोभिचले भने, “म मेरो परिवार र मसँग नजिक भएका सबैमा उनीहरूको धैर्यप्रति धन्यवाद दिन चाहन्छु, खेलाडी, प्रशिक्षक र उनका अफिसियलहरूले मलाई दिएको जिम्मेवारीप्रति । क्लबमा मलाई अवसर दिएकोमा निर्देशकलाई पनि धन्यवाद दिन चाहन्छु ।”

इब्राहिमोभिच सन् २०२० मा दोस्रोपटक मिलान आएका थिए । उनले मिलानका लागि १६३ खेलमा ९३ गोल गरेका छन् । मिलानबाट उनले दुईपटक इटालियन सिरी ‘ए’को उपाधि जितेका छन् ।

समग्रमा इब्राहिमोभिचले फुटबल करियरमा ५११ गोल गरेका छन् । उनले बार्सिलोना, पेरिस सेन्ट जर्मन (पीएसजी), मिलान र आयाक्स गरी चार देशका क्लबबाट घरेलु लिगको उपाधि जितेका छन् ।

इब्राहिमोभिचले स्वीडेनका लागि १२१ अन्तर्राष्ट्रिय खेलमा ६२ गोल गरेका छन् । उनी स्वीडेनका उच्च गोलकर्ता समेत हुन् ।