काठमाडौं । नेपालमा डीटीएच  सेवा प्रदान गरिरहेको डिश मिडिया नेटवर्कले डाटा सेन्टर र इन्टरनेट सेवामा आईएसओ प्रमाणीकरण प्राप्त गरेको छ । अमेरिको क्वालिटी स्ट्यान्डर्ड रेजिस्टेकले डिशहोमलाई आईएसओ सर्टिफाई गरेको हो ।

यसका लागि कम्पनीको योजना, चुस्त नेतृत्व, कार्यसम्पादन मूल्यांकन, ग्राहक सेवाको गुणस्तरका आधारमा निरीक्षण गरिएको थियो ।

स्याटेलाइट टेलिभिजनमार्फत नेपालको कुनाकाप्चामा गुणस्तरीय सेवा प्रदान गरिरहेको कम्पनीले पछिल्लो समय अरू सेवा प्रदायकको भन्दा सुलभ र उच्च गुणस्तरको इन्टरनेट सेवा सञ्चालन गरिरहेको जनाएको छ । कम्पनीले आफ्नो सेवालाई विस्तार गर्ने क्रममा डाटा सेन्टर पनि सञ्चालनमा ल्याएको छ ।

नेपालको पे टीभी इन्डस्ट्रीमा आमूल परिवर्तन ल्याउन सफल रहेको डिशहोमले आफ्ना ग्राहकलाई उच्च गतिको इन्टरनेट सहज र सर्वसुलभ मूल्यमा प्रदान गरिरहेको जनाएको छ । यस्तै, ग्राहक सेवालाई अझ सहज बनाउन देशैभरि विभिन्न स्थानमा डिलर नेटवर्क, सर्भिस सेन्टर र २४ सै घण्टा ग्राहक सेवा केन्द्र सञ्चालन गरिरहेको जनाइएको छ ।

उत्कृष्ट ग्राहक सेवा, कुशल नेतृत्व, व्यवस्थित कार्यसम्पादनको कारणले कम्पनीले आईएसओ प्रमाणीकरण प्राप्त गर्न सफल भएको जनाएइको छ ।

अबका दिनमा कम्पनीले अझै समयानुसारको प्रविधि प्रयोग गरी विभिन्न सेवालाई थप गुणस्तरीय र ग्राहक सेवालाई अझ प्रभावकारी बनाउँदै लैजाने जनाएको छ ।