काठमाडौं । ०७३ फागुन ५ गते राजधानीको न्युरोडस्थित मख्खन गल्लीमा साडी तथा कुर्तासुरुवालको कारोबार गर्ने श्यामसुन्दर अग्रवालको अपहरण गरी फिरौती लिएको र रकम बुझ्न प्रयोग गरिएकी आफ्नै प्रेमिकाको हत्या गरी फरार भएका भक्तपुरका प्रकाश लामिछानेलाई इन्टरपोलको सहयोगमा दुबईमा पक्राउ गरी नेपाल ल्याइएको छ । 
लामिछानेले आफ्नी प्रेमिका धादिङकी राधिका श्रेष्ठलाई हत्या गरी फरार भएका थिए ।  उनी भारत हुँदै दुबई पुगेको थाहा पाएपछि प्रहरीले सक्रियता बढाएको थियो ।

नेपाल प्रहरीले इन्टरपोलमार्फत लामिछानेको नाममा रेडर्कनर नोटिस जारी गरेको थियो । त्यसैका आधारमा दुबई प्रहरीले लामिछानेलाई गएको असोज २६ गते नियन्त्रणमा लिएको थियो । हत्या आरोपी लामिछानेलाई दुबईबाट आइतबार साँझ फ्लाई दुबईमार्फत नेपाल ल्याइपुर्याइएको छ ।

यसरी भएको थियो घटना  
 

०७३ फागुन ५ गते श्यामसुन्दरलाई उनकै पसलमा काम गर्ने र उनकै सहयोगी राधिकाले होटलमा बोलाएर बन्धक बनाई १० लाख ७० हजार फिरौती रकम असुलेकी थिइन् ।
त्यही रात उनै राधिकाको उनकै प्रेमी प्रकाश लामिछानेले हत्या गरेको प्रहरी अनुसन्धानबाट खुलेको थियो । 

महानगरीय अपराध महाशाखाका अनुसार ०७३ फागुन ५ गते दिउँसो १ बजेतिर अग्रवालकी विश्वासपात्र राधिकाले अग्रवाललाई सुनधारास्थित सनराइज गेष्टहाउसमा खाजा खान बोलाइन् । होटलमा दुईवटा कोटा बुक गरिएको थियो । एउटा कोठामा अग्रवाल र राधिका अनि अर्को कोठामा अपहरणको योजना बनाउने प्रकाश लामिछाने, किशोर गिरी र सरोज घोरासैनी थिए । राधिकाले अग्रवाललाई मदिरा खुवाएर लठ्ठ बनाइन् । अग्रवाल मदिराले लठ्ठ भएको बेला अर्को कोठाबाट तीनजना निस्किए र मुखमा टेप अनि हातखुट्टा बाँधे । त्यसपछि पैसा माग्न थाले । 

महाशाखाका डीएसपी अजय केसीका अनुसार अग्रवालसँग ७० हजार रुपैयाँमात्र रहेछ । अरु पैसा लिन राधिका आफैँ साडी पसल गइन् । पसलबाट राधिकाले २ लाख नगद र अग्रवालको चेक लिएर आइन् । अग्रवालबाट अपहरणकारीले २ लाख ७० हजार नगद लिए र ८ लाखको चेक काट्न लगाए । राधिकाले पनि आफू फस्न सक्ने भन्दै चेक छिमेकी पसलेको नाममा काट्न लगाइन् । उनले जसको नाममा चेक काट्न लगाएकी थिइन् ती भारतीय नागरिक थिए । भारतीय भएकाले बैंकले नमानेपछि फेरि उनले भक्तपुरबाट एकजनालाई झिकाइन् र उक्त रकम सोही दिन निकालेर लगिन् । 

अग्रवाललाई त्यही होटलको कोठामा बाहिरबाट ताला लगाएर छाडियो । उनीहरु भागिसकेपछि बल्ल होटलका कर्मचारीले चाल पाए अनि प्रहरीलाई खबर गरे ।

डीएसपी केसीकाअनुसार उनीहरू चारै जनाले २ लाखका दरले रकम बाँडे । घटनापछि चारैजनाले वसन्तपुरमा बसेर पैसा बाँडे । त्यसपछि सरोज घोरासैनी र किशोर गिरी ट्याक्सी चढेर कालीमाटी हुँदै भक्तपुर गए । राधिका र उनका प्रेमी प्रकाश पनि छुट्टै बाटो गरेर भक्तपुर नै गए । 

उनीहरुको योजना त्यो साँझ भक्तपुरमा प्रकाशको घरमा रमाइलो गर्ने थियो । प्रकाशको घर भक्तपुर बागेश्वरीमा हो । सबै जना त्यहीँ जम्मा भएर घटनाको बारेमा अन्यलाई जानकारी हुन सक्ने भन्दै प्रकाशले किशोर र सरोजको सहयोगमा प्रेमिका राधिकालाई प्रकाशकै घरको कोठामा हत्या गरे अनि नजिकै लगेर गाडिदिए ।

घटनाको भोलिपल्ट प्रकाश विमानस्थल हुँदै दिल्ली हानिए । उनका सहयोगी किशोर गिरी पनि केही दिनपछि स्थलमार्ग हँुदै भारत गए अनि केही दिनमै नेपाल फर्किए । महाशाखाको टोलीले गिरी भारतबाट नेपाल आउँदै गरेका बेला त्रिभुवन विमानस्थलबाट पक्राउ गर्यो । सरोज घोरासैनी पनि असनबाट पक्राउ परे । प्रकाश लामिछाने भने दिल्ली हुँदै दुबई हानिए । 

“पैसा कमाउनकै लागि राधिकालाई प्रेमिका बनाएको रहेछ,” एक अनुसन्धान अधिकारीले भने । उनका अनुसार प्रकाश लामिछानेले पैसा कमाउनकै लागि राधिकालाई प्रेमिका बनाएको रहस्य खुलेको छ । 

प्रकाशको वसन्तपुर गणेशथाननजिकै मोबाइल मर्मत पसल छ । राधिका त्यही बाटोबाट आउजाउ गर्दा उनीहरुको चिनजान भएको प्रहरीले जनाएको छ ।

राधिका श्यामसुन्दरको पसलमा काम गर्ने कर्मचारीमध्येकी विश्वासी पात्र हुन् । उनले अग्रवालको हिसाबकिताबका बारेमा सबै कुरा थाहा पाउने भएका कारण प्रकाशले राधिकालाई प्रेमिका बनाएर उनकै माध्यमबाट अपहरण गरी बन्धक बनाएर फिरौती रकम असुल्ने योजना बनाएको र त्यहीअनुसार रकम असुलेको अनुसन्धानबाट खुलेको छ । 

पोल खुल्ने डरले प्रेमिकाको हत्या
 

घटनाको पोल खोल्ने डरले प्रकाशले प्रेमिका राधिकाको हत्या गरेको प्रहरीको निष्कर्ष छ । अपहरण तथा बन्धकमा सहयोगी भूमिका खेल्ने सरोज घोरासैनी प्रकाशका मामाका छोरा हुन् भने किशोर उनका साथी हुन् । उनीहरु सबै मिलेर अग्रवालबाट रकम लिएपछि राधिकाको हत्या गर्ने योजना बनाएको प्रहरी अनुसन्धानबाट खुलेको छ ।

राधिकाको शव प्रहरीले ७३ फागुन २० गते नै फेला पारे पनि अभियुक्तहरू फरार भएका कारण अनुसन्धान जारी राखेको थियो ।  अपहरण तथा हत्या अभियोगमा पक्राउ परेका अन्य अहिले कारागारमै छन् । 

दुबईबाट नेपाल झिकाइएका लामिछानेलाई नेपाल प्रहरीको इन्टरपोल शाखाले आवश्यक कारवाहीका लागी महानगरीय अपराध महाशाखाको जिम्मा लगाएको छ । 

सच्याइएको* प्रकाश हुनुपर्नेमा अन्यथा भएकाले सच्याइएको छ ।