काठमाडौं । ओलिभर जिरौडले गरेको गोलमा एसी मिलानले आइतबार राति  इटालियन सिरी ‘ए’मा युभेन्टसलाई १–० ले हराएको छ । योसँगै मिलानले शीर्ष चारमा रहेर अर्को सिजन यूईएफए च्याम्पियन्स लिगमा स्थान सुरक्षित गरेको छ ।

लिगमा अन्तिम खेल बाँकी हुँदा मिलान ६७ अंक जोडेर चौथो स्थानमा छ । त्यो पाँचौँ स्थानमा रहेको एटलान्टाभन्दा ६ अंकले माथि हो । पराजित युभेन्टस ५९ अंकसहित सातौँ स्थानमा छ ।

खेलाडी स्थानान्तरणको नियम उल्लंघन गरेको भन्दै युभेन्टसलाई कारबाही गरेर १० अंक कटौती गरिएको थियो । त्यसकारण युभेन्टस सातौँ स्थानमा झरेको हो । कारबाहीमा परेपछि युभेन्टसले लिगमा खेलेका दुवै खेल हारेको छ ।

मिलानले शीर्ष चारमा स्थान सुरक्षित गरेसँगै इटालियन सिरी ‘ए’बाट अर्को सिजन च्याम्पियन्स लिग खेल्ने चारै टिमको टुंगो लगोको छ । सिरी ‘ए’बाट अब लिग विजेता नेपोली, लाजियो, इन्टर मिलान र एसी मिलानले च्याम्पियन्स लिगमा प्रतिस्पर्धा गर्नेछन् ।

एसी मिलान जारी सिजन च्याम्पियन्स लिगको सेमिफाइनलमा सहरी प्रतिद्वन्द्वी इन्टरसँग पराजित हुँदै प्रतियोगिताबाट बाहिरिएको हो । फाइनलमा स्थान पक्का गरेको इन्टरले अब उपाधिका लागि इंग्लिस प्रिमियर लिगको क्लब म्यानचेस्टर सिटीविरुद्ध प्रतिस्पर्धा गर्नेछ ।

सातौँ स्थानमा रहेको युभेन्टसले युरोपा कन्फेरेन्स लिगमा स्थान बनाएको छ । यरोपा लिगको फाइनलमा इटालियन क्लब एएस रोमाले स्पेनिस क्लब सेभियालाई पराजित गर्दै उपाधि जितेमा युभेन्टसको पनि युरोपा लिग खेल्ने सम्भावना कायम रहन्छ ।

गए राति इटालियन सिरी ‘ए’मा विजेता नेपोलीले बोलोग्नासँग २–२ को बराबरी खेल्यो । लाजियो क्रोमोनेसलाई ३–२ ले हराउँदै दोस्रो स्थानमा उक्लियो । लेसले मोन्जालाई १–० ले पराजित गर्‍यो ।