जनकपुरधाम । मधेस प्रदेश सरकार विस्तारका लागि सत्ता गठबन्धनमा आबद्ध दलहरूबीच सहमति जुटेको छ । नेताहरू जनकपुरधाममा दुई दिन बैठक बसेर सहमतिमा पुगेका हुन् ।

मंगलबार (आज) दिउँसो २ बजे नयाँ मन्त्रीहरूको शपथग्रहण कार्यक्रम तय गरिएको छ । नेपाली कांग्रेसले दुई तथा नेकपा (एकीकृत समाजवादी) र लोकतान्त्रिक समाजवादी पार्टी (लोसपा)ले एक/एक मन्त्रालय पाउने सहमति भएको छ ।

हाल जनता समाजवादी पार्टी (जसपा), नेकपा (माओवादी केन्द्र) र जनमत पार्टी सरकारमा सहभागी छन् । जसपाबाट मुख्यमन्त्री सरोजकुमार यादव, खानेपानी तथा ऊर्जामन्त्री सिंहासन सा कलवार, स्वास्थ्य तथा जनसंख्यामन्त्री सुरिता साह र अर्थमन्त्री सञ्जयकुमार यादव छन् ।

माओवादी केन्द्रबाट सुनीता यादव उद्योग, पर्यटन तथा वनमन्त्री छन् । जनमत पार्टीबाट महेश यादव शिक्षा, समाजकल्याण र वाणिज्यमन्त्री र वसन्त कुशवाह भूमि व्यवस्था, कृषि तथा सहकारीमन्त्री छन् ।

गएको चैत २१ गते नेकपा (एमाले) सरकारबाट बाहिरिएपछि रिक्त रहेका चार मन्त्रालयमा कांग्रेसले दाबी गरेको थियो । तर, एकीकृत समाजवादी र लोसपालाई पनि सरकारमा सहभागी गराउनुपर्ने भएकाले कांग्रेसलाई तीन मन्त्रालय दिने सहमति गरिएको छ । एमालेबाट सभामुख बनेका रामचन्द्र मण्डललाई हटाएर त्यो पद कांग्रेसलाई दिने कसरत पनि भइरहेको नेताहरूको भनाइ छ ।

आज दोस्रोपटक सरकार विस्तार गरिँदा कांग्रेसबाट संसदीय दलका नेता समेत रहेका कृष्णप्रसाद यादवले भौतिक पूर्वाधार विकास मन्त्रालय र कांग्रेस प्रदेश समितको उपसभापति समेत रहेका वीरेन्द्रप्रसाद सिंहले स्वास्थ्य तथा जनसंख्या मन्त्रालयको जिम्मेवारी पाउने सहमति छ ।

यस्तै, एकीकृत समाजवादीबाट संसदीय दलका नेता गोविन्दबहादुर न्यौपाने मन्त्री बन्नेछन् । लोसपाबाट पनि एकजना मन्त्री बन्नेछन् । यी दुई दलले पाउने मन्त्रालयमा अन्तिम सहमति हुन नसकेको नेताहरूले बताएका छन् ।

लोसपाका नेता उपेन्द्र महतोले आफूहरूले पाउने मन्त्रालयबारे टुंगो लाग्न बाँकी रहेको र अहिले सोही विषयमा छलफलमा भइरहेको बताए ।

यसैबीच, माओवादी केन्द्र प्रदेश सरकारबाट बाहिरिने तयारीमा छ । सम्मानजनक मन्त्रालय नपाएको भन्दै माओवादी सरकारबाट बाहिरिन लागेको हो । माओवादी केन्द्र मधेस प्रदेश संसदीय दलको बैठकबाट यस्तो निर्णय गरिएको सांसद रहबर अन्सारीले जानकारी दिए ।

उनका अनुसार माओवादी र लोसपाले दुई/दुई मन्त्रालय पाउने सहमति भएको थियो । तर, सो सहमतिअनुसार जसपाले मन्त्रालय दिन नमानेका कारण सरकार छाड्न बाध्य भएको उनले बताए । जसपाले कांग्रेसलाई मात्र प्राथमिकतामा राखेको उनको भनाइ छ ।

अहिले माओवादी, लोसपा र जनमतका शीर्ष नेताहरूबीच छलफल भइरहेको छ ।