काठमाडौं । राष्ट्रपति रामचन्द्र पौडेलले सरकारका तर्फबाट आर्थिक वर्ष २०८०–८१ को नीति तथा कार्यक्रम संघीय संसद्मा प्रस्तुत गरेका छन् । बिरामी राष्ट्रपति पौडेलले करिब दुई घण्टा लगाएर प्रस्तुत गरेका कार्यक्रममा पुरानै कार्यक्रमलाई निरन्तरता दिइएको पाइएको छ ।
तर राष्ट्रपति शीतलनिवासबाट संसद् भवन जाँदा होस् या फर्किँदा विगतका वर्षमा जस्तै जनताले भने खासै सास्ती खेप्नु परेन । राष्ट्रपतिको सम्मानका लागि भनेर एकदिन विगतका वर्षमा जस्तै तामझाम गर्ने योजना भए पनि पौडेलले भने त्यसलाई अस्वीकार गरेको उनको सचिवालय स्रोतले जानकारी गराएको छ ।
सामाजिक सञ्जालमा सर्वसाधारणको प्रतिक्रियाले नीति कार्यक्रमभन्दा पनि राष्ट्रपतिको सवारीमा बढी ध्यान केन्द्रित रहेको देखिन्थ्यो । तर नीति तथा कार्यक्रममा नयाँ घोषणा भन्दा पनि विगतका कार्यक्रमलाई बढीजसो निरन्तरता दिइएको छ ।
नीति तथा कार्यक्रममा घोषणा गरिएको कार्यक्रममा निजी उत्पादन विदेशीभन्दा २० प्रतिशत महंगो भएपनि निजीलाई प्राथमिकता दिने, ‘एक घर एक धारा’ लगायतका कार्यक्रम पुरानै हुन् । गतवर्ष तत्कालीन राष्ट्रपति विद्यादेवी भण्डारीले घोषणा गरेजस्तो यो वर्ष त्यही कार्यक्रमको घोषणा रामचन्द्र पौडेलले गरे ।
अहिले अर्थतन्त्र मन्दीमा छ । सरकारको तथ्यांकले चालु आर्थिक वर्षको दुई त्रैमासमा आर्थिक वृद्धिदर ऋणात्मक भएको देखाएको छ । बजारमा उपभोग घटेको छ भने सहरमा व्यापार गर्न बनेका घरहरुमा सटरहरु खाली छन् ।
नीति कार्यक्रमले संकटमा परेको अर्थतन्त्रलाई उकास्ने नीति नै ल्याएको छैन । एक किसिमले भन्दा सरकारले नीति तथा कार्यक्रममा संकटमा परेको अर्थतन्त्रलाई बिर्सेको छ । नीति तथा कार्यक्रमको आधारमा बजेट ल्याउने मान्यता हो ।
सरकारको नीति तथा कार्यक्रमले अर्थतन्त्र उकासिने अपेक्षामा रहेका व्यवसायी र राहतको अपेक्षामा रहेका जनतालाई आशा जगाउने काम गरेको छैन । अर्थमन्त्री डा. प्रकाशरण महतले त्यसै पनि बजेट अगाडि नै बजेटबाट ठूलो अपेक्षा गर्न जरुरी नभएको बताएका छन् ।
उनले राहत दिने अर्थतन्त्रलाई उकास्ने जिम्मा आफूले बजेटमा नभएर राष्ट्र बैंकले ल्याउने मौद्रिक नीतिलाई छाडिएका छन् ।
