काठमाडौं । सहिद स्मारक ‘ए’ डिभिजन लिगमा साविक विजेता मछिन्द्र फुटबल क्लब रेलिगेसन क्षेत्रको फ्रेन्ड्स क्लबसँग बराबरीमा रोकिएको छ ।

बिहीबार त्रिपुरेश्वरस्थित दशरथ रंगशालामा सम्पन्न खेलमा मछिन्द्रले फ्रेन्ड्ससँग २–२ को बराबरी खेल्दै अंक बाँडेको हो । दुईपटकको अग्रता जोगाउन नसक्दा फ्रेन्ड्स अंक बाँड्न बाध्य बन्यो ।

दशरथ रंगशालामा प्रकाश बुढाथोकीले ६८औँ मिनेटमा गोल गर्दै फ्रेन्ड्सलाई अग्रता दिलाएका थिए । मछिन्द्रका आफिज ओलावालेले ७१औँ मिनेटमा गोल गर्दै टोलीलाई खेलमा फर्काएका थिए । तर, त्यसको तीन मिनेटपछि रफिक एमेनुले गोल गर्दै पुनः फ्रेन्ड्सलाई अग्रता दिलाएका थिए । खेलको निर्धारित समय सकिन सात मिनेट बाँकी रहँदा ओलावालेले नै व्यक्तिगत दोस्रो गोल गर्दै मछिन्द्रको हार टारे ।

बराबरीमा रोकिएसँगै मछिन्द्रले शीर्ष स्थानको चर्च ब्वाइज युनाइटेडसँग अंक बराबरी गर्ने मौका गुमायो । १९ खेलबाट ३१ अंक जोडेको मछिन्द्र तालिकाको तेस्रो स्थानमा छ । जुन शीर्ष स्थानको चर्च ब्वाइज युनाइटेडभन्दा दुई अंक कम हो ।

समान खेलबाट २१ अंक जोडेको फ्रेन्ड्स तालिकाको १३औं स्थानमा छ । फ्रेन्ड्स रेलिगेसन क्षेत्रभन्दा माथि रहेको सशस्त्र प्रहरी बलको एपीएफ क्लबभन्दा दुई अंकले पछि छ ।

आजै च्यासल रंगशालामा सम्पन्न खेलमा मनाङ मर्स्याङ्दी क्लबले संकटा क्लबसँग २–२ को बराबरी खेल्दै अंक बाँड्यो । मनाङ पनि दुईपटकको अग्रता जोगाउन नसक्दा अंक बाँड्न बाध्य बनेको हो ।

खेलको १९औँ मिनेटमा कोफी कोउडोले गोल गर्दै मनाङलाई अग्रता दिलाएका थिए । तर, ४४औँ मिनेटमा युसेफ अट्रिसले गोल गर्दै संकटालाई खेलमा फर्काएका थिए । त्यसको अर्को मिनेटमा कोफीले दोस्रो गोल गर्दै मनाङलाई २–१ को अग्रतामा राखेका थिए । तर, ५२औँ मिनेटमा मनिष डाँगीले गोल गरेपछि संकटा पुनः खेलमा फर्कियो ।

बराबरीसँगै १९ खेलबाट २३ अंक जोडेको मनाङ तालिकाको सातौँ स्थानमा उक्लिएको छ । समान खेलबाट २२ अंक जोडेको संकटा तालिकाको आठौँ स्थानमा छ ।