काठमाडौं । हुवावेले आफ्ना साझेदारहरूका लागि २०२३ को नयाँ क्लाउड पार्टनर प्याकेज सार्वजनिक गरेको छ । मंगलबार काठमाडौंमा एक कार्यक्रमको आयोजना गर्दै हुवावेले नयाँ क्लाउड पार्टनर प्याकेज सार्वजनिक गरेको हो ।
गो क्लाउड र ग्रो क्लाउड फ्रेमवर्कले पुनर्विक्रेता, वितरक, सेवा प्रदायक र हार्डवेयर साझेदारहरूलाई प्रोत्साहन र लगानीका अवसरहरूको दायरा फराकिलो पारेको बताएको छ ।
ह्वावेको ग्रो क्लाउड योजनामा स्टयान्डर्ड, एडभान्स, प्रिमियम र स्ट्र्याटेजिक गरी चारवटा प्याकेजहरू रहेको कम्पनीले जनाएको छ ।
प्रत्येक प्याकेजमा विभिन्न इन्सेनटिभहरू जस्तै त्रैमासिक र वार्षिक वृद्धि लाभहरू र हुवावेको एडभान्स्ड क्लाउड सर्भिसको बिक्रीमा विशेष लाभको योजनाहरू पनि ल्याएको कम्पनीको भनाइ छ ।
नयाँ प्याकेजले मार्केटिङ डेभलपमेन्ट फण्ड, हुवावे क्लाउड प्रयोग गरे वापत नगद कुपन र साझेदारका कर्मचारीहरूलाई बिक्री विस्तार गर्नका लागि प्रोत्साहन कार्यक्रमसहित पाँच थप फाइदाहरू पनि प्रदान गर्ने बताइएको छ ।
यस प्याकेजको प्रमुख प्राथमिकता साझेदारहरूको व्यवसायलाई सफल हुन आवश्यक उपकरण र स्रोतहरू उपलब्ध गराएर प्रोत्साहन गर्नु भएको कम्पनीको भनाइ छ ।
कार्यक्रमको मुख्य फाइदा मध्ये एक क्षमता विकास र प्रमाणीकरण भएको र यसले साझेदारहरूलाई हुवावेले उपलब्ध गराएका निःशुल्क प्राविधिक कोर्सहरू र प्रमाणपत्रमार्फत आफ्नो सीप र विशेषज्ञता विकास गर्ने अवसर दिने हुवावेले बताएको छ ।
ह्वावेकोको गो क्लाउड सर्भिस नयाँ प्याकेजको अर्को महत्वपूर्ण पक्ष हो । यस प्याकेजले क्लाउड रिसेल, कन्सल्टिङ, क्लाउड माइग्रेसन र कार्यान्वयन, एप्लिकेसन रि आर्किटेक्ट, क्लाउड नेटिभ डेभलपमेन्ट र व्यवस्थापन जस्ता सेवामार्फत व्यावसायिक क्लाउड सेवा निर्माण गर्न सेवा साझेदारहरूलाई सहयोग गर्ने बताइएको छ ।
यी कार्यक्रमहरूको प्रमुख उद्देश्य साझेदारहरूको व्यावसायिक क्षमताहरूको पहिचान र विकास गर्ने, हुवावेको क्लाउडमा आधारित प्रयोगहरूको विकास गर्ने, सफ्टवेयर समाधानहरूलाई सुदृढीकरण गर्ने, अवस्थित डाटाहरूलाई हुवावे क्लाउडमा स्थानान्तरण गर्ने र हुवावे क्लाउडसँग संयुक्त मार्केटिङ सञ्चालन गर्नु भएको कम्पनीले जनाएको छ ।
हुवावे क्लाउड साझेदार कार्यक्रम हुवावेका साझेदारहरूको लागि आफ्नो व्यवसाय विस्तार गर्न र आफ्नो सीप सुधार गर्ने उत्कृष्ट अवसर हुने कम्पनीको भनाइ छ ।
यस्ता विभिन्न योजनाहरु मार्फत हुवावेले साझेदारहरूसँगको सम्बन्ध सुदृढ बनाउन र प्रविधिको पहुँच देशव्यापी रूपमा विस्तार गर्न प्रतिबद्ध रहने हुवावेले जनाएको छ ।
हुवावेका डेभलपमेन्ट पार्टनर जितेन्द्रकुमार शर्माले सञ्चालन गरेको कार्यक्रममा नेपालका हुवावे क्लाउड पार्टनरहरू प्रिक्सा टेक्नोलोजी, जेनेस सोलुसन्स, क्लाउड वर्ल्ड सोलुसन्स, टेलिनेट र एडेक्सको सहभागिता रहेको थियो ।