काठमाडौं । बेलायतका प्रधानमन्त्री ऋषि सुनक र नेदरल्यान्ड्सका प्रधानमन्त्री मार्क रुट्टेले युक्रेनलाई अत्याधुनिक लडाकु विमान एफ–१६ उपलब्ध गराउने प्रतिबद्धता जनाएका छन् ।

युक्रेनलाई लडाकु जेट उपलब्ध गराउने अन्तर्राष्ट्रिय गठबन्धन निर्माण गर्न सुनक र रुट्टे सहमत भएका हुन् ।

युक्रेनी राष्ट्रपति भ्लोदोमिर जेलेन्स्कीले लामो समयदेखि पश्चिमा राष्ट्रहरूसित लडाकु विमानको माग गर्दै आएका छन् ।

“प्रधानमन्त्री (सुनक) र प्रधानमन्त्री रुट्टेले युक्रेनलाई वायु लडाइँ क्षमता प्रदान गर्न अन्तर्राष्ट्रिय गठबन्धन बनाउन सहमति जनाएका छन् । त्यसका लागि तालिमदेखि एफ–१६ लडाकु विमान खरिद गर्ने कुरामा सहयोग हुने,” सुनकको डाउनिङ स्ट्रीट कार्यालयद्वारा जारी विज्ञप्तिमा उल्लेख छ ।

आइसल्यान्डमा भएको काउन्सिल अफ युरोप शिखर सम्मेलनको बैठकपछि मंगलबार यस्तो विज्ञप्ति जारी गरिएको हो ।

अमेरिकाद्वारा निर्मित एफ–१६ लडाकु विमान रुसी वायुसेनाविरुद्ध युक्रेनका लागि महत्त्वपूर्ण हुनसक्छ । तर, योसँगै शक्तिशाली मिसाइल र सटीक निसानाको जानकारी पनि जोडिन्छ । यसका लागि पश्चिमा राष्ट्रले थप सहायता प्रदान गर्नुपर्ने हुन्छ । त्यस्तो हुँदा रुसविरुद्धको युद्धमा पश्चिमा मुलुकहरूको संलग्नता झनै गम्भीर भने बन्नेछ ।

बेलायत र नेदरल्यान्ड्सले लडाकु विमान पठाउन खोजे पनि अमेरिकी राष्ट्रपति जो बाइडेनले गएको जनवरीमा यो कदम नचाल्ने बताएका थिए । अलजजिराबाट ।