site stats
बाह्रखरी :: Baahrakhari
खेल
Global Ime bankGlobal Ime bank
बार्सिलोनाले जित्यो २७औँ ला लिगाको उपाधि

काठमाडौं । रोबर्ट लेवानडोवस्कीको दुई गोलप्रेरित बार्सिलोनाले आइतबार राति इस्पानियोललाई ४–२ ले हराएको छ । जितसँगै बार्सिलोनाले २७औँ स्पेनिस ला लिगाको उपाधि जितेको छ । बार्सिलोनाले चार खेल अगावै उपाधि जितेको हो । 

बार्सिलोनाको सफल इतिहासमा आकर्षक आक्रमक फुटबल ब्रान्ड जोडिन्छ । तर, जारी सिजन बार्सिलोना फरक शैली अपनाएको छ । मुख्य प्रशिक्षक जाभी हर्नान्डेजले परम्परागत शैलीलाई अलग राख्दै बलियो रक्षापंक्तिमा ध्यान केन्द्रित गरेका थिए । जाभीले अपनाएको शैलीमा उनी आफैँले सहज महसुस गरेको नहुन सक्छ । किनकी जाभी आफैँले पनि बार्सिलोना र स्पेनबाट ठूला उपाधि जित्दा आक्रमक मिडफिल्डको भूमिकामा हुन्थे । उनी आक्रमक फुटबलको प्रतीक थिए । २०२१ नाभेम्बरमा बार्सिलोनाको मुख्य प्रशिक्षक नियुक्त हुँदा पनि जाभीले क्लबको शैली ‘अपरिवर्तनीय’ भएको बताएका थिए । 

“हामीले कुनै पनि खेल शैलीलाई धोका दिएका छैनौं,’’ बार्सिलोनाका प्रशिक्षक जाभीले गत मार्चमा रियालविरुद्ध १–० को विजय हासिल गरेपछि भनेका थिए । रियालको घरेलु मैदान सान्टियागो बेर्नाबेउमा उत्कृष्ट रक्षात्मक प्रदर्शन गर्दै १–० को विजय हासिल गरेको थियो । जाभी थप्छन्, “बल पोसेसन नहुँदा म सन्तुष्ट छैन । कहिलेकाहीँ प्रतिद्वन्द्वी र परिस्थितिले तपाईंलाई त्यहाँ लैजान्छ । तर, रक्षापंक्ति पनि खेलको हिस्सा हो ।’’

जारी सिजन बार्सिलोनाले ३४ मध्ये २७ खेल जितेको छ । त्यसमा बार्सिलोनाले ६४ गोल गरेको छ भने १३ गोलमात्र खाएको छ । जुन युरोपकै शीर्ष पाँच लिगमा सबैभन्दा राम्रो नतिजा हो । बार्सिलोनाले घरेलु मैदानमा त अझ दुई गोलमात्र खाएको छ । त्यसमध्ये एक आत्मघाती र अर्को पेनाल्टीमा गोलमा खाएको हो । 

बार्सिलोनाको रक्षापंक्ति बलियो हुनुमा गोलकिपर मार्क आन्द्रे टेर–स्टेगन र रक्षकद्वय रोनाल्ड अराउजो र जुलेस कौन्डेको भुमिका मुख्य रह्यो । बार्सिलोनाले २०१८/१९ सिजनपछि पहिलोपटक उपाधि जितेको हो । त्यतिबेला बार्सिलोनाको अग्रपंक्तिमा लियोनल मेसी र लुइस स्वारेज थिए । यसपटक भने जाभीले लेवानडोवस्कीलाई प्रयोग गरेका थिए । त्यस्तै औसमाने डेम्बेले लयमा फर्किएका थिए भने विंगर कौन्डे र राफिन्हाको भूमिका पनि महत्त्वपूर्ण रह्यो । त्यस्तै मिडफिल्डमा पेड्री र गाभीको भूमिका रह्यो । कप्तान सर्जियो बुस्केट र जोर्डी अल्बाको अनुभवले बार्सिलोनालाई अझ बलियो बनायो । 

गएराति पनि स्पानियोलको घरेलु मैदानमा लेवानडोवस्कीको गोलबाट ११औँ मिनेटमा अग्रता लिएको थियो । २०औँ मिनेटमा एलेक्स बाल्डेले अग्रता दोब्बर बनाए । ४०औँ मिनेटमा लेवानडोवस्कीले व्यक्तिगत दोस्रो गोल थपे । ५३औँ मिनेटमा कौन्डेले चौथो गोल गरे । 

७३औं मिनेटमा जाभियर पाउडो र इन्जुरी समयमा जोसेलुले गरेको गोलबाट स्पानियोलले पुनरागमनको प्रयास गरे पनि धेरै ढिला भइसकेको थियो । 

जितपछि बार्सिलोनाले ३४ खेलबाट ८५ अंक जोडेको छ । जुन दोस्रो स्थानको रियाल मड्रिडभन्दा १४ अंकले अगाडि हो । लिगमा अब १२ अंकको खेलमात्र बाँकी छ । त्यसकारण बार्सिलोनाले चार खेल अगावै लिग उपाधि पक्का गरेको हो । पराजित स्पानियोल भने ३१ अंकका साथ रेलिगेशन क्षेत्रमा छ ।

प्रकाशित मिति: सोमबार, जेठ १, २०८०  ०९:०५
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
सरकारले तत्काल सम्बोधन गरोस् !
सरकारले तत्काल सम्बोधन गरोस् !
Hamro patroHamro patro