काठमाडौं । रोमेलु लुकाकुको दुई गोलप्रेरित इन्टर मिलानले शनिबार राति इटालियन सिरी ‘ए’मा सासउलोमाथि ४–२ को विजय हासिल गरेको छ । जितसँगै इन्टर मिलान लिगको तेस्रो स्थानमा उक्लिएको छ ।

गएको बुधबार राति च्याम्पियन्स लिग सेमिफाइनलको पहिलो लेगमा सहरी प्रतिद्वन्द्वी एसी मिलानलाई २–० ले पराजित गरेको इन्टरले घरेलु मैदानमा लुकाकुको गोलबाट ४१औँ मिनेटमा अग्रता लिएको थियो । त्यसअघि, पाहुना टोली सासउलोका डोमेनिको बारार्डीले गरेको गोललाई भिडियो सहायक रेफ्रीले अफसाइड घोषित गरिदिएको थियो ।

५५औँ मिनेटमा रुवान ट्रेसोल्डीले गरेको आत्मघाती गोलमा इन्टरले अग्रता दोब्बर बनाएको थियो । ५८औँ मिनेटमा लाउटारो मार्टिनेजले तेस्रो गोल थपे । ६३औँ मिनेटमा म्याथ्युज हेनरिकले गरेको गोलबाट सासउलोले पुनरागमनको प्रयास गर्‍यो ।

७७औँ मिनेटमा सासउलोका डेमिड फ्रेस्टेसीले अर्को गोल थप्दै अन्तर कम गरे । तर, खेल सकिन एक मिनेट बाँकी हुँदा लुकाकुले अर्को गोल थपेपछि इन्टरले महत्त्वपूर्ण तीन अंक पक्का गरेको हो ।

जितपछि इन्टरले ३५ खेलबाट ६६ अंक जोडेको छ । त्यो दोस्रो स्थानको युभेन्टससँग अंक बराबरी हो । चौथो स्थानको लाजियोभन्दा एक अंकले माथि हो । युभेन्टसले एक खेल कम खेलेको छ । पराजित सासउलो ४४ अंकका साथ १३औँ स्थानमा छ ।

चौथो स्थानको लाजियोले गए राति लेससँग २–२ को बराबरी खेलेको थियो ।

गए राति साविक विजेता एसी मिलान भने रेलिगेसनबाट बच्न संघर्ष गरिरहेको स्पेजियासँग २–० ले पराजित भयो । हारसँगै मिलान ६१ अंकका साथ पाँचौँ स्थानमा छ । योसँगै मिलानको शीर्ष चारमा रहने सम्भावना कमजोर बनेको छ ।

यस्तै, सातौँ स्थानको एटलान्टा पनि १५औँ स्थानको सालेर्निटानासँग १–० ले स्तब्ध बन्यो ।