काठमाडौं । सन्तोष साहुखल र थ्री स्टार क्लबबीचको मतभेदले नयाँ मोड लिएको छ । बिहीबार सन्तोषको फेसबुक पेजमा लिगको मध्यसिजनमा थ्री स्टार क्लब छोड्नुको कारण उल्लेख गर्दै लामो पोस्ट आएको छ । जसमा थ्री स्टारका प्रशिक्षकले मिडियामा स्वास्थ्यका कारण अब खेल्न नसक्ने बताएपछि सन्तोषले बीचमै टिम छोडेको जिकिर छ ।

यसअघि थ्री स्टारका मुख्य प्रशिक्षक मेघराज केसीले लिगमा न्युरोड टिम (एनआरटी)सँगको खेलपछि सन्तोषबाट आशा नगरिएको कार्य भएपछि टिमबाट निकालेको बताएका थिए । त्यसबेला केसीले लिगमा थ्री स्टारले खुमलटारसँग खेल्दा हाफ टाइममा सन्तोषले ड्रेसिङ रुमको ढोकामा लात्ताले हानेको र जर्सी फुकाली फालेर ‘अब म खेल्दिनँ’ भनेर हिँडेको बताएका थिए ।

केसीले यसबारे घटनाको दोस्रो दिन टिमका अन्य खेलाडीमाझ ‘यो कार्य गलत हो’ भनेर दुई मिनेट बोल्न आग्रह गर्दा सन्तोषको ‘गड मदर’ (अया मियोशी)ले सन्तोषले माफी माग्न नमानेको र पछि थ्री स्टारका कप्तान विक्रम लामासँग क्लबको ‘रिलिज पेपर’ मागेको बताएका थिए ।

तर, आज सन्तोषको व्यवस्थापकीय टिम ‘एनपीएओ रिउले वल्र्ड’का अध्यक्ष अया मियोशीले आज त्यसलाई नकार्दै प्रशिक्षकका कारण क्लब छोडेको बताएका छन् ।

के छ सन्तोषको पोष्टमा ?

“सबैलाई नमस्कार,
सबैभन्दा पहिले सन्तोषलाई समर्थन गर्ने सबैको लागि हामी जिम्मेवार छौँ ।

सन्तोषले लिगको बीचमा टिम छाड्नुको सही कारण बताउन आवश्यक छ । किनभने, स्वास्थ्य समस्याका कारण सन्तोषले अब खेल्न नसक्ने मुख्य प्रशिक्षकले मिडियालाई बताए । उहाँको विरुद्ध लड्ने नियत नभएर सही सन्देश दिने उहाँका समर्थकहरूप्रति हाम्रो दायित्व छ । प्रबन्धक र हामीबीचको समझमा भिन्नता छ, जुन भिन्नता मानिसहरू र संस्कृतिहरूमा पनि छ । र, म न त सोच र विश्वासलाई मिलाउन खोजिरहेको छु, न त निष्फल विवादको प्रयास गरिरहेको छु । हामीले गर्न चाहेको एउटै कुरा भनेको हाम्रो संसारलाई अर्को पुस्ताको लागि राम्रो ठाउँ बनाउनको लागि कार्यहरू गर्नु हो र हामीले यसलाई महसुस गर्छौँ । हामी जापानीको रूपमा सधैँ इमानदार हुन चाहन्छौँ । आफूप्रति इमान्दार भएर, अनुशासन कायम गरेर र प्रयास गरेर चिजहरू परिवर्तन गर्न सकिन्छ भन्ने मलाई थाहा छ, त्यसैले म मार्गदर्शन गर्दै छु । ‘होइन’ भन्न सक्ने क्षमता सही नभएको विरुद्ध र कसैलाई ‘होइन’ भनेको सुन्ने क्षमता– मलाई लाग्छ कि यो विशेषता मानिसहरूमा परिवर्तनलाई प्रभाव पार्न धेरै महत्वपूर्ण छ । जसले यस कुराको अर्थ बुझ्न सक्छ, उसले आफैमा परिवर्तन ल्याउन सक्छ । यही बिन्दु हो, जसको लागि हामीले लक्ष्य राखेका छौँ र सन्तोषको पनि इच्छा छ । हामी सही वा गलत निर्णय गर्ने आशामा छैनौँ, सन्तोषले नेपाल फुटबलको अवस्था सुधार्न मात्र चाहन्छ ।

उसले यसको लागि सधैँ काम गर्छ । अन्तमा, सन्तोषले सधैँ मसँग राय सोध्ने कारण– सन्तोषले सिकेर प्रयास गर्न मेरो विचार सोधेको छ । ती सबै प्रक्रियाहरूले उहाँ अहिले को हुनुहुन्छ भनेर आकार दिन्छ । र थप रूपमा, उसले आफ्नो प्रयासलाई निरन्तरता दिन धेरैभन्दा धेरै सिक्ने प्रयास गरिरहन्छ । किनकि, उसलाई थाहा छ कि उसले शरीर र मानसिकता प्राप्त गर्न सक्छ, जसले उसलाई आफ्नो उमेरमा आफ्नो प्रदर्शन कायम राख्दै फुटबल खेल्न सक्षम बनाउँछ । यो उनको सिकाइको परिणाम हो । जापान आउनुअघि उनको तालिम र मानिसहरूप्रतिको दृष्टिकोणमा आएको परिवर्तनलाई ध्यान दिनुभयो भने सजिलै बताउन सक्नुहुन्छ । उसको शरीर र खेल शैलीले उसले दैनिक जीवनमा कसरी सोच्दछ, सिक्न र प्रयास गर्छ भनेर बताउनेछ । यसपटक भएको सबैको माध्यमबाट, म चाहन्छु कि सकेसम्म धेरै मानिसहरूले केही महसुस गरून् र आफूलाई परिवर्तन गर्न कदम चाल्न सकुन् । यसको एउटा परिवर्तनले अर्को ठूलो परिवर्तन ल्याउनेछ भन्ने मेरो दृढ विश्वास छ ।”