काठमाडौं । बीडीएस चौथो वर्षको परीक्षा दिँदै गरेकी छात्राले आत्महत्या गरेपछि चितवन मेडिकल कलेज तनावग्रस्त बनेको छ । घटनाको विरोधमा विद्यार्थीले अस्पतालको डेन्टल ओपीडी सेवा ठप्प पारेका छन् ।

बीडीएस चौथो वर्ष अध्ययनरत विद्यार्थी सिम्रन थापाले बुधबार आफ्नै कोठामा अत्महत्या गरेकी थिइन् । परीक्षा दिइरहेकी थापालाई कलेजका शिक्षकले जबरजस्ती परीक्षा हलबाट निकालेर तनाव दिएको र सोही कारण उनले कोठामा गई आत्महत्या गरेको आरोप विद्यार्थीहरुको छ ।

उनीहरुले घटनाको छानबिन गरी दोषी शिक्षकलाई कडा कारबाही गर्नुपर्ने माग राखेका छन् । पीडितले न्याय नपाएसम्म मेडिकल कलेजको सम्पूर्ण ओपीडी सेवा अनिश्चितकालका लागि बन्द भएको विद्यार्थी संघर्ष समितिले प्रेस विज्ञप्तिमार्फत जानकारी दिएको छ ।

बिहीबार डेन्टल ओपीडीबाहेक अन्य सेवा भने सुचारु रहेको अस्पतालले जनाएको छ ।

यसैबीच मेडिकल विद्यार्थीहरुको छाता संगठन फेडेरेसन अफ नेप्लिज मेडिकल स्टुडेन्टसले घटनाको सत्यतथ्य छानबिन गरी दोषीउपर कारबाहीका माग राखेको छ । फेडेरेसनले बिहीबार विज्ञप्ति जारी गर्दै विद्यार्थी संघर्ष समितिका मागहरुप्रति ऐक्यवद्धता जनाएको छ ।

पछिल्लो समय विद्यार्थीलाई शिक्षकले मानसिक यातना दिने र यस्ता घटना बढ्दै गएको भन्दै शिक्षण शैलीलाई परिष्कृत गर्नुपर्ने माग राखिएको छ ।