काठमाडौं । टेल विन्ट (दक्षिण बहने सतही हावा) को कारण त्रिभुवन अन्तर्राष्ट्रिय विमानस्थलमा जहाज अवतरण हुन सकेको छैन । एयर इन्डिगोको जहाजले त्रिभुवन अन्तर्राष्ट्रिय विमानस्थल काठमाडौंमा अवतरण गर्न नसकेर इन्डियाको लखनउ डाइभर्ट भएको छ ।
दिल्लीबाट काठमाडौं आएको एयर इन्डिगोको जहाजले काठमाडौंको आकाशमा होल्ड गर्दा टेल विन्टको कारण अवतरण गर्न नसकेपछि डाइभर्ट भएको विमानस्थलका प्रवक्ता टेकनाथ सिटौलाले जानकारी दिए ।
अन्तर्राष्ट्रिय उडानका जहाज त्रिभुवन अन्तर्राष्ट्रिय विमानस्थलको दक्षिण साइडबाट अवतरण गर्छन् । जहाज अवतरण गर्नको लागि ‘टेल विन्ट’ को बेग १० देखि १२ नटिकल माइल हुनुपर्छ ।
तर, काठमाडौंको आकाशका ‘टेल विन्ट’ गति १७ नटिकल माइल पुगेको थियो । जसले गर्दा एयर इन्डिगोको जहाजले आकाशमा जहाज होल्ड गरेको थियो । टेल विन्टको गति नघटेपछि जहाज दिल्ली डाइभर्ट भएको हो ।
अहिले दोहाबाट आएको कतार एयरलाइन्सलगायतको जहाजहरूले मिष्ड एप्रोज गरिरहेका छन् ।