काठमाडौं । प्रतिनिधिसभा सदस्य डा.स्वर्णिम वाग्लेले अर्थनीति टाइट भएको भन्दै मौद्रिक नीतिबाट अगाडि बढ्न खोजेको भन्दै यो गलत भएको बताएका छन् । सोमबार प्रतिनिधिसभा बैठकमा प्रि–बजेटमाथिको छलफलका क्रममा उनले अर्थनीतिबाट नै धेरै गर्न सकिने बताएका हुन् ।
“दिगो विकास र जलवायु परिवर्तनका कुरा आएका छन् । हिजो मैले अर्थमन्त्रीबाट सुनेँ– फिस्कल स्पेस अलिकति टाइट छ । मनिटरी उपकरणहरूबाट हामी अगाडि जान्छौँ भन्नुभयो, यो गलत हो । फिस्कल स्पेस खोज्न र सिर्जनशील हुन सक्ने हो भने व्यापक स्पेस अझै पनि छ,” उनले भने, “त्यसको लागि तपाईंले यही जलवायु परिवर्तनको मुद्दा र यही दिगो विकासको मुद्दाबाट नै अगाडि बढ्न सक्नुहुन्छ ।”
दशौँ लाखको हाराहारीमा रोजगारीका लागि विदेशिएको भन्दै त्यसलाई रोक्न यो बजेटले व्यवस्था गर्नुपर्ने पनि उनले बताए । छोटो समयमा ठूल्ठूला विकास गर्नुपर्ने भएकाले पनि आधार बनाउन पर्ने उनको भनाइ छ ।
डिजिटलाइजेसनको नाममा सामान्य काम पनि नभएको उनले बताए । त्यस्तै, आर्थिक वृद्धि र स्थायित्वको कुरा जायज भएपछि पहिलेदेखि नै यही कुरा उठान गर्न उचित नभएको उनले बताए ।