काठमाडौं । नेकपा (एमाले)का उपाध्यक्ष एवं पूर्वअर्थमन्त्री विष्णु पौडेलले निजी क्षेत्रको मनोबल बढाउन बजेटमा विशेष व्यवस्था गर्नुपर्ने बताएका छन् ।
सोमबार प्रतिनिधिसभा बैठकमा प्रि–बजेटमाथिको छलफलका क्रममा उनले बजेटमा निजी क्षेत्रको मनोबललाई बढाउने गरी व्यवस्था गर्नुपर्नेमा जोड दिए ।
“निजी क्षेत्रको मनोबल बढाउने भनेर मात्र हुँदैन । हामीले निजी क्षेत्रको मनोबल कसरी बढाउँछौँ ? निजी क्षेत्र के भनिरहेको छ भने, हिजो चालु पुँजी कर्जाले समस्या सिर्जना गर्यो । त्यसलाई स्टलमेन्टमा तिर्ने व्यवस्था गरियो । त्यसले पनि पुुगेन,” उनले भने, “अब हामीले ऋणको ब्याज तिर्न सकिरहेका छैनौँ । हाम्रो कारखाना चलिरहेको छैन । हाम्रो व्यापार चलिरहेको छैन । सभामुख महोदय, हरेक तेस्रो सटर बन्द हुँदै छ देशव्यापी रूपमा, तथ्यांक संकलन गर्यौँ त ? हरेक पसलहरूमध्ये तेस्रो पसल बन्द हुँदै छ । भोलि अर्काे दोस्रो पसल पनि बन्द हुने अवस्था देखिँदै छ ।”
कलकारखाना बन्द हुँदै गएको भन्दै उनले समस्या समाधान गर्ने विषयमा सोच्नुपर्ने बताए । निजी क्षेत्रको मनोबल बढाउने भनेर मात्र नहुने उनले बताए ।
व्यवसायीको ऋणको ब्याजको समस्या समाधान गर्नुपर्नेमा उनले जोड दिए । सरकारका नीति उत्पादनमैत्री हुनुपर्ने उनको भनाइ छ ।
