काठमाडौं । २५६७ औं वुद्ध जयन्तीको अवसरमा सीता एण्ड सन्सले आयोजना गरेको कास्की जिल्ला माध्यमिक तह स्तरीय चित्रकला प्रतियोगिता सम्पन्न भएको छ । कक्षा ७ देखि १० सम्मको प्रतियोगितामा मदरल्यान्डमा विका एन्जल नेपाली पहिलो, कुम्दिनी होम्सका अविस्था पालिखे दोस्रो, वालोदय माविका इसिवा पौडेल तेस्रो र हिमालचन स्कुलका आविष्कार लामिछानेले सन्तवना पुरस्कार प्राप्त गरे । 

उनीहरूले क्रमशः हाइसेन्सको ३२ इन्चको एचडी टीभी, कोनका २२०० वाटको भ्याकुम क्लिनर, डाइकोमको वाटर डिस्नेपन्सर हट एन्ड कोल्ड र लिभ्प्युरको वाटर फिल्टर पुरस्कार प्राप्त गरे ।

दश जोड दुईतर्फ सैनिक आवासीय माविका सन्दीप लामा पहिलो, मदरल्यान्ड माविका कपिलराज गाहा दोस्रो, सिर्जना माविका लक्ष्मण पोख्रेल तेस्रो र शिशुनिकेतन माविका पूर्णकुमार गुरुङले सान्तवना पुरस्कार प्राप्त गरेका छन् । 

पहिलो, दोस्रा, तेस्रो र सान्तवना हुनेले क्रमशः ३२ इन्चको स्मार्ट टीभी, खिन्डको एयर फायर, नियोको स्प्रिङ आरओ फिल्टर र  केन्टको वाटर फिल्टर प्राप्त गरेका छन् । यसबाहेक प्रतियोगितामा सहभागी मध्येबाट पाँच जनालाई गोला प्रथाबाट डिश होमको सेटअपबक्स प्याकेज प्रदान गरिएको छ । 
 
पोखरा ७ मासबारस्थित श्रिकृष्ण माविमा आयोजित प्रतियोगितामा कास्की जिल्लाभित्रका विभिन्न विद्यालयबाट ८१ जना प्रतियोगीले विश्व शान्ति र प्रेम शीर्षकमा २ घण्टा ३० मिनेट लागाएर आफ्नो चित्रकला प्रस्फुटन गरेका थिए ।

क्यान्भासमा चित्र कोरेर उद्घाटन गर्दै प्रमुख अतिथि वरिष्ठ कलाकार दुर्गा बराल (वात्सायन)ले व्यवसाय क्षेत्रबाट नवकलाकारलाई प्रतिभा प्रस्फुटन गराउन प्रतियोगिता आयोजना गर्नु राम्रो काम भएको बताए । पोखरा महानगरपालिका ७ का वडाअध्यक्ष राममोहन आचार्यले यस्ता कार्यक्रममा वडाको पनि साथ र सहयोग रहने वताए ।

प्रतियोगिताको सहकार्य संस्था सिर्जनशील कलाकार समूहका अध्यक्ष मिलन शेरचनले यस्ता कार्यक्रमले विधार्थी तथा नवकलाकारलाई आफ्नो कलालाई निरन्तरता दिन हौसला मिल्ने बताइन् । निर्णायक मण्डलका संयोजक सिर्जनशील कलाकार समूहका सल्लाहकार लोकप्रसाद गुरुङले सबै सहभागी प्रतियोगीको चित्रकला उत्कृष्ट रहेको र आफ्नो कलालाई निरन्तरता दिन आग्रह गरे । 

सीता एण्ड सन्सका संचालक सावित्री आचार्यको अध्यक्षतामा भएको कार्यक्रममा स्वगत मन्दीप आचार्य र संचालन सिर्जनशील कलाकार समूहका कार्यवाहक अध्यक्ष दलबहादुर गुरुङले गरेका थिए ।