काठमाडौं । अर्थमन्त्री डा. प्रकाशशरण महतले अर्थतन्त्रमा महत्वपूर्ण योगदान दिने निजी क्षेत्रलाई सरकारले बाँध्न नखोजेको बताएका छन् ।
आगामी वर्षको बजेट निर्माणको चरणमा भएकोले सरकारले व्यावसायिक क्षेत्रमा भएका समाधान गर्न आफू दत्तचित्त भएर लागेको बताएका छन् ।
बुधबार आईबीएन मिडिया एन्ड रिसर्चले आयोजना गरेको कार्यक्रममा बोल्दै मन्त्री महतले अब राष्ट्र बैंक र सरकार मिलेर काम गर्नुपर्ने बताए ।
“अहिले उद्योगी व्यवसायी समस्यामा परेको भन्ने कुरा जताततै छ । हामी समस्या हल गरेर अगाडि बढ्छौँ । मैले गर्न पर्ने ठाउँमा म गर्छु । तर, मैले मात्र गरेर केही हुँदैन,” उनले भने, “राष्ट्र बैंकले पनि केही गर्नुपर्ने हुन्छ । त्यो उसको पाटो हो । हामीले मिलेर अघि बढ्नुपर्छ ।”
खर्च नगर्दा पनि हुने ठाउँको खर्च कटौती गर्दै जाने र खर्च गरेर अर्थतन्त्र चलायमान बनाउनु पर्ने उनको भनाइ छ । करका विषयमा पनि सुधार गर्नुपर्ने भएकाले यसमा पनि सरकारले व्यापक सुधार गर्नुपर्नेमा आफू सजक रहेको उनले बताए ।
अर्थतन्त्र सुधारका लागि पार्टीहरूको बीचमा सहकार्य गरेर अगाडि बढ्ने पनि उनको भनाइ छ । रोजगारी बढ्न लगानी बढ्नुपर्ने भन्दै उनले निजी क्षेत्र फैलिए रोजगारी र करका दायरा बढ्ने पनि बताए ।