विराटनगर । विराट गोल्डकपको सातौँ संस्करणमा फाइनल पुगेका पाहुना टोली भारत केरलाको लुका सकर क्लब र घरेलु टिम विराटनगर सिटी (बीसीएफ) दुवै टिम उपाधि जित्नेमा आत्मविश्वासी देखिएका छन् ।

केरलाको लुका सकर पहिलोपटक नेपालमा गोल्डकपको उपाधि जित्ने तयारीसहित मैदानमा उत्रिँदा घरेलु समर्थकको साथ लिएर विराटनगर उपाधिलाई घरमै राख्ने लक्ष्यमा हुनेछ । प्रतियोगिताको अन्तिम खेलअघि बुधबार ‘प्री–म्याच कन्फ्रेन्स’मा दुवै टिमका प्रशिक्षक र कप्तानले उपाधिका लागि खेल्ने प्रतिक्रिया दिए ।

विराटनगरका प्रशिक्षक सन्तोष न्यौपानले घरेलु मैदानमा विराट गोल्डकपमा टिमको लक्ष्य उपाधि जित्नु रहेको बताउँदै भने, “प्रतियोगिताको फाइनलमा पुगेका छौँ । उपाधि उचाल्ने प्रयास रहने छ ।”

विराटनगरका कप्तान विशाल श्रेष्ठले पाहुना टिमका खेलाडी शारीरिक रुपमा सशक्त रहेकाले उपाधि भिडन्तमा प्राविधिक खेल प्रस्तुत गर्ने प्रतिकृया दिए । “लुका सकर राम्रो टिम हो । अग्ला कदका खेलाडी छन् । त्यही भएर हामी टेक्निकल खेल प्रर्दशन गर्नेछौँ,” विशाल भन्छन् ।

नेपालमा पहिलो गोल्डकप खेल्न आएको लुका सकर क्लब भारतीय राज्य केरलाको प्रिमियर लिगको पाँचौँ स्थानमा छ । क्लबका प्रशिक्षक नभास नोकाले फाइनलमा पनि पुरानै लयलाई निरन्तरता दिँदै उपाधिका लागि खेल्ने बताए ।

नेपालकै प्रतिष्ठित उपाधि उचाल्न फाइनलमा उत्कृष्ट प्रदर्शन गर्ने बताउँदै भने, “हामीलाई थाहा छ, यो धेरै प्रतिष्ठित प्रतियोगिता हो । त्यसैले हामीले मेहनतसाथ खेल्नु छ ।”

साविक विजेता एपीएफ र लिग खेल्दै आएको ‘ए’ डिभिजनको टिम संकटालाई जित्दै फाइनलसम्मको यात्रा तय गरेका कारण पनि प्रशिक्षक नोका उपाधि जित्नेमा विश्वस्त देखिन्थे ।

केरलाका कप्तान अर्सादले प्रतियोगितामा उत्कृष्ट खेल प्रर्दशन गरेकोले नेपालको दर्शकको साथ र समर्थनले गोल्डकपको फाइनलको उपाधि जित्ने दाबी गरे । “हाम्रो खेलले नेपाली दर्शकको मन जित्नेमा आशावादी छौँ,” उनले भने ।

विराटनगरले प्रतियोगितामा विभागीय टिम नेपाल पुलिस क्लब र जावलाखेल युथ क्लबलाई हराउँदै फाइनलमा स्थान पक्का गरेको हो । विराटनगरले क्वार्टरफाइलनमा नेपाल पुलिसलाई १–० ले र सेमिफाइनलमा जावलाखेलको चुनौती २–१ ले पन्छाउँदै फाइनलसम्मको यात्रा तय गरेको हो ।

यता, प्रतियोगितामा पहिलोपटक सहभागी भएको केरलाले क्वार्टरफाइनलमा संकटा क्लबलाई सडनडेथमा ८–७ ले पन्छाउँदै अन्तिम चारको यात्रा गरेको थियो । सेमिफाइनलमा केरलाले साविक विजेता विभागीय टिम एपीएफलाई पेनाल्टी सुटआउटमा ४–२ गोलले हराएर फाइनलमा स्थान पक्का गरेको हो ।

घरेलु टोली तेस्रोपटक प्रतियोगिताको उपाधि नजिक पुगेको हो । यसअघि २०१८ सालमा तत्कालीन महेन्द्र गोल्डकपमा घरेलु टिम मोरङ–११ नाममा फाइनलमा पुगेको थियो । तर, फाइनलमा भारतको कोलकातासँग पराजित भएपछि मोरङ–११ ले त्यसबेला उपविजेतामा चित्त बुझाएको थियो ।

तर, त्यसको अर्को संस्करण २०१९ सालमा पनि फाइनलसम्मको यात्रा तय गरेको मोरङ–११ ले त्यसबेला भने उपाधि पनि जित्यो । त्यसपछि विभिन्न उतारचढाव पार गर्दै प्रतियोगिताको सातौँ संस्करणसम्म आइपुग्दा घरेलु टिमले ६१ वर्षपछि फाइनलमा स्थान बनाएको हो ।

गत वर्षको लिग विजेता मछिन्द्र क्लबको सेटलाई मैदानमा उतारेको आयोजक विराटनगरले सेमिफाइनलमा विमल घर्तीमगरलाई पनि पहिलो रोजाइमा राखेको थियो । सेमिफाइनलमा संकटालाई २–१ ले हराउँदा दुवै असिस्ट विमलले नै गरेका थिए ।

सहिद रंगशालामा उपाधि भिडन्त बिहीबार साँझ ६ः४५ बजेदेखि सुरु हुनेछ ।

चैत ९ देखि सुरु भएको प्रतियोगिताको विजेताले २० लाख १५ हजार र उपविजेता १० लाख १५ हजार रुपैयाँ पुरस्कार प्राप्त गर्नेछन् । यस्तै, उत्कृष्ट प्रशिक्षक, गोलकिपर, मिडफिल्डर, रक्षक, फरवार्ड, उच्च गोलकर्ता, व्यवस्थापक र फेयर प्ले अवार्ड सबैले जनही २५÷२५ हजार रुपैयाँ पुरस्कार पाउनेछन् ।

२०१८ सालदेखि महेन्द्र गोल्डकपको नाममा सञ्चालन हुँदै आएको फुटबल प्रतियोगिता २०५७ सालदेखि विराट गोल्डकपको रूप परिवर्तन भएको थियो ।