काठमाडौं । आईसीसी क्रिकेट विश्वकप लिग–२ को अन्तिम शृंखलाको पहिलो खेलमा पपुवा न्युगिनी (पीएनजी) विरुद्ध ५२ रनको जित निकाल्दा नेपालसँगै ओपनर आसिफ शेखले ब्याटिङमा कीर्तिमानी प्रर्दशन गरे ।

कीर्तिपुरस्थित त्रिवि क्रिकेट मैदानमा नेपालले प्रस्तुत गरेको २९८ रनको लक्ष्य पछ्याएको पीएनजीले ४७.१ ओभरमा सबै विकेट गुमाएर २४५ रनमात्र बनाउन सक्यो । त्यसअघि टस हारेपछि ब्याटिङमा आएको नेपालले ४९.१ ओभरमा सबै विकेट गुमाएर २९७ रनको योगफल खडा गरेको थियो ।

पीएनजीविरुद्धको खेल एकदिवसीय क्रिकेटमा नेपाली ब्याटिङका लागि कीर्तिमानी बन्यो । लिग–२ का पछिल्लो नौ खेलमध्ये आठ खेलमा जित निकालेको नेपालले पीएनजीविरुद्ध खडा गरेको योगफल एकदिवसीय अन्तर्राष्ट्रिय क्रिकेटमा नेपालले बनाएको अहिलेसम्मकै सबैभन्दा ठूलो योगफल हो ।

नेपालले अहिलेसम्म एकदिवसीय क्रिकेटको एकै खेलमा २९० रनको आंकडा छुन सकेको थिएन । तर, पीएनजीविरुद्ध ओपनर आसिफ शेखले अन्तर्राष्ट्रिय क्रिकेटकै पहिलो शतक बनाएपछि नेपालले पीएनजीसामु कीर्तिमानी योगफल खडा गर्‍यो ।  

यसअघि कीर्तिपुरमै भएको लिग–२ अन्तर्गतको शृंखलामा नामिबियाविरुद्ध २८७ रन बनाउनु एकदिवसीय क्रिकेटमा नेपालले बनाएको अहिलेसम्मको ठूलो योगफल थियो । उक्त खेलमा नामिबियाले प्रस्तुत गरेको २८५ रनको लक्ष्य पछ्याउने क्रममा नेपालले २८७ रन बनाएको थियो । 

यस्तै, आजको खेल सुरु हुनुभन्दा अघिसम्म नेपालले पहिले ब्याटिङ गरेर २७८ रन बनाउनु नै अहिलेसम्मको सबैभन्दा ठूलो योगफल थियो । 

आसिफको पहिलो शतक र एकदिवसीय क्रिकेटमा एक हजार रन पूरा

पीएनजीविरुद्ध नेपाली टिमले ब्याटिङमा कीर्तिमानी योगफल खडा गर्दा आसिफ शेखले पनि कीर्तिमानी ब्याटिङ गरे । पीएनजीविरुद्ध आफ्नो अन्तर्राष्ट्रिय क्रिकेट करियरकै पहिलो शतक बनाएका आसिफ एकदिवसीय क्रिकेटमा नेपालबाट एक हजार रन पु¥याउने ब्याटर समेत बने । आसिफले एकदिवसीयमा सात र ट्वान्टी–२० क्रिकेटमा दुई अर्धशतक बनाएका छन् ।

१०१ बलमा १० चौका र दुई छक्कासहित १०० रन पूरा गरेका आसिफ नेपालबाट एक हजार रन बनाउने दोस्रो ब्याटर बने । पीएनजीविरुद्ध ९० रन बनाएसँगै आसिफले नेपालबाट एक हजार रन बनाउने ब्याटरमा कप्तान रोहितकुमार पौडेलसँगै आफ्नो नाम पनि लेखाए । पीएनजीविरुद्ध ११० रनमा पभेलियन फर्किएका आसिफले ३२ इनिङमा एक हजार रन बनाए । 

उनले सन् २०२१ मा पीएनजीविरुद्धकै खेलबाट नेपालका लागि एकदिवसीय अन्तर्राष्ट्रिय क्रिकेटमा ‘डेब्यु’ गरेका थिए । आसिफअघि एक हजार रन क्लबमा प्रवेश गरेका कप्तान रोहितले अहिलेसम्म ४१ इनिङमा एक हजार २०९ रन बनाएका छन् । उनलाई पछ्याइरहेका आसिफको खातामा १०२० रन छ । ३४.०० को एभरेजमा ब्याटिङ गर्ने आसिफ एकदिवसीय क्रिकेटमा नेपाली ब्याटरमध्ये सबैभन्दा राम्रो ब्याटिङ एभरेज भएको खेलाडीसमेत हुन् । आसिफपछि रहेका रोहित र भीम सार्कीको ब्याटिङ एभरेज क्रमशः ३३.५८ र ३३.०० छ ।

“लामो समयदेखि यसको लागि प्रतिक्षारत थिए । ३० खेल खेलिसकेका थिए । फाइनल्ली आज आयो र राम्रो समयमा स्कोर गर्न सके । एकदमै खुसी लागिरहेको छ,” शतकपछि आसिफ भन्छन्, “घरेलु मैदानमा खेल्दा त्यसमा पनि घरेलु मैदानमा शतक बनाउदा विशेष महसुस हुन्छ । प्रत्येक बलमा समर्थकले समर्थन गरिरहेका हुन्छन् । यसले ब्याटिङ गर्दा हामीलाई पनि मज्जा दिन्छ । अब हामीलाई बाँकी तीन खेलमै जित निकाल्नु छ । तर, अहिलेलाई भने हामीले एक पटकमा एक खेल खेल्ने रणनीति लिएर खेलिरहेका छौं ।”

लिग–२ को अन्तिम शृंखलामा नेपालसँगै पीएनजी र युनाइटेड अरब इमिरेट्स (यूएई) सहभागी छन् । जितसँगै ३३ खेलबाट ३४ अंक जोडेको नेपाल अंकतालिकाको पाँचौ स्थानमा छ । एकदिवसीय मान्यता जोगाउन नेपाललाई अब बाँकी तीन खेलमध्ये एकमा जितको नतिजा पर्याप्त बन्नेछ । तर, लिग–२ को शीर्ष तीनमा रहन भने नेपाललाई अबका तीनवटै खेलमा जित आवश्यक छ । 

३३ खेलबाट नौ अंक जोडेको पीएनजी तालिकाको पुछारमा छ । ३२ खेलबाट ३१ अंक जोडेको यूएई छैटौं स्थानमा छ । लिग–२ का शीर्ष पाँच टिमले एकदिवसीय मान्यता पाउनेछन् । 

विश्वकप छनोट 
लिग–२ बाट शीर्ष तीन टिमले जिम्बाब्वेमा १८ जुनदेखि ९ जुलाइसम्म हुने एकदिवसीय विश्वकप २०२३ को छनोट प्रतियोगितामा स्थान बनाउनेछन् । बाँकी चार टिमले नामिबियामा २४ मार्चदेखि ४ अप्रिलसम्म हुने आईसीसी क्रिकेट विश्वकप क्वालिफायर प्लेअफ खेल्नेछन् । 

प्लेअफमा च्यालेन्ज लिगबाट शीर्ष दुई टिम र लिग–२ को पुछारमा रहेका चार टिमले प्रतिस्पर्धा गर्नेछन् ।

नामिबियामा हुने विश्वकप क्वालिफायर प्लेअफका शीर्ष दुई टिमले पनि जिम्बाब्वेमा हुने एकदिवसीय विश्वकप २०२३ को छनोट प्रतियोगितामा स्थान बनाउनेछन् । 

जिम्बाब्वेमा हुने एकदिवसीय विश्वकप २०२३ को छनोट प्रतियोगितामा क्वालिफायर प्लेअफका शीर्ष दुई टिम, क्रिकेट विश्वकप लिग–२ बाट शीर्ष तीन टिम र आईसीसीको पूर्ण सदस्य राष्ट्रहरूको सुपर लिगबाट पुछारमा रहेका पाँच टिमले प्रतिस्पर्धा गर्नेछन् । 

सुपर लिगको शीर्ष सात टिमले सिधै आईसीसी एकदिवसीय विश्वकपमा स्थान बनाउनेछन् । आयोजक राष्ट्रका रुपमा भारतले पनि सिधै विश्वकपमा स्थान बनाउनेछ ।