काठमाडौं । काठमाडौंको बालाजुस्थित एक टहरोमा बस्दै आएकी ९० वर्षीया वृद्धाको हत्यामा संलग्न आरोपमा एकजना पक्राउ परेका छन् । पक्राउ पर्नेमा तारकेश्वर नगरपालिका–६ का ३९ वर्षीय नरेन्द्र शिवभक्ती छन् । उनी मृतक वृद्धा महिलाका छिमेकी हुन् ।

तार्केश्वर नगरपालिका–६ बस्ने डिल्ली पतुवार मंसिर २२ गते वडा नम्बर–३ मा पर्ने जंगलमा मृत अवस्थामा फेला परेकी थिइन् । उनको टाउकोमा गम्भीर चोट देखिएको थियो । पोस्टमार्टम रिपोर्टमा उनको टाउकोमा हिर्काएको खुलेको थियो ।

हत्याको रहस्य नखुले पछि उपत्यका अपराध अनुसन्धान कार्यालयका डीएसपी गोविन्द पन्थी नेतृत्वको टोली खटिएको थियो ।

मृतक डिल्लीका चार छोरी र एक छोरा भए पनि उनी एक्लै आफ्नै जग्गामा भएको टहरोमा बस्दै आएकी थिइन् । उनका श्रीमानको मृत्यु भइसकेको थियो ।

उनी सधैँजसो छोरीका घरमा खाना खान जाने गरेको र २० गते नगए पछि बालाजु प्रहरीमा हराएको उजुरी परेको थियो । उनी मंसिर २२ गते मृतावस्थामा फेला परेकी थिइन् । 

उनको नाममा करोडभन्दा बढी पर्ने जमिन रहेकाले सोही कारण हत्या गरिएको हुनसक्ने र घटनामा नजिकैका आफन्तको संलग्नता हुनसक्ने प्रहरीको अनुमान थियो ।

अपराधी ससुराली गएपछि खुल्यो रहस्य
पछिल्लो एक सातासम्म प्रहरी अपराधीसम्म पुग्न सकेको थिएन । प्रहरीभित्र उनको सम्पत्तीका लागि आफन्तले नै हत्या गरेको हुनसक्ने प्रहरी अधिकारीको अनुमान थियो ।

२२ गते डिल्ली मृत अवस्थामा फेला परेपछि छिमेकी सबै घटनास्थलमा पुगे । तर, तीमध्ये एक छिमेकी नरेन्द्र भने श्रीमती र छोरा लिएर स्याङ्जामा रहेको ससुराली गएको सूचना प्रहरीले पायो । उक्त सूचना प्रहरीका लागि शंका गर्ने आधार बन्यो । ज्यामी काम गर्दै आएका नरेन्द्रमाथि शंका गर्ने अर्को आधार पनि प्रहरीले फेला पार्यो ।

घटनाको अनुसन्धानमा संलग्न उपत्यका अपराध अनुसन्धान कार्यालयका अधिकारीहरु भन्छन्, “उनले २१ गते गाउँमै एक महिलाको ५ सय उधारो तिरेका रहेछन् । उनी अहिले पर्दैन भन्दाभन्दै अरुको पैसा किन खाने भनेर दिएका रहेछन् । त्यो हाम्रा लागि बलियो क्लु बन्यो ।”

छिमेकको हत्या हुँदा उनी ससुराली गएको खबर पाएको प्रहरीले उनी त्यहाँ भए नभएको स्याङ्जा प्रहरीमार्फत जानकारी लियो । उनी ससुरालीमै भएको पुष्टि भएपछि प्रहरी टोलीले अनुसन्धान अगाडि बढायो ।

नरेन्द्र परिवारसहित काठमाडौं फर्किए । प्रहरीले उनलाई नियन्त्रणमा लियो । अनुसन्धानका क्रममा उनले हत्या आफै्र्रंले गरेको स्वीकार गरे ।

प्रहरीका अनुसार नरेन्द्रले २० गते डिल्लीलाई चिसापानी चप्पल कारखानामा राहत वितरण गरिरहेको सुनाएका थिए । डिल्लीले पनि राहत लिने चाहना व्यक्त गरिन् । डिल्लीले आफ्नो शारीरिक अवस्थताले राहत बोक्न नसक्ने र नरेन्द्रले बोकेर घरसम्म ल्याइदिए पैसा दिने बताइन् । नरेन्द्र तयार भए । नरेन्द्र र डिल्ली सँगसँगै घरबाट निस्किए । सोही क्रममा उनीहरु वडा नम्बर–३ मा पर्ने जंगलमा पुगे । त्यहाँ नरेन्द्रले डिल्लीलाई चुरोट खाने प्रस्ताव गरे । दुवैले चुरोट सेवन गरेपछि नरेन्द्रले डिल्लीले कम्मरको पटुकामा रुपैयाँ राखेको जानकारी पाएका थिए ।

अनुसन्धानमा संलग्न अधिकारीहरु भन्छन्, “डिल्लीले पैसा पटुकामा बाँधेर राख्छिन् भन्ने सबैलाई थाहा भएको रहेछ । सोही पैसाको लोभमा परेर नरेन्द्रले डिल्लीलाई पछारेका रहेछन् । त्यसपछि टाउको र गर्धनमा ढुङ्गा प्रहार गरी हत्या गरेका रहेछन् । हत्यापछि उनी डिल्लीसँग रहेको रुपैयाँ झिकेर घर फर्किए ।”

डिल्लीको पटुकामा ५० हजार रुपैयाँ रहेको खुलेको छ । प्रहरीले नरेन्द्रविरुद्ध कर्तव्यज्यान मुद्दामा अनुसन्धान अगाडि बढाएको छ ।