नेपाली कांग्रेसका महामन्त्री गगनकुमार थापा चौथोपटक सांसदको दौडमा छन् ।  बाह्रखरीले अनुमोदन गरेका २५ उमेदवारको सूचीमा थापा पहिलो नम्बरमा परेका छन् ।

दोस्रो जनआन्दोलनमा अग्रमोर्चामा रहेका थापा तेस्रोपटक सांसदको प्रतिष्पर्धामा छन् ।

सांसद जितेरमात्रै नभइ यसपल्ट प्रधानमन्त्रीको उमेदवारका लागि पार्टीभित्रैबाट अघि सर्ने प्रतिवद्धता पनि उनले गरेका छन् ।

चुनावी प्रचारमै रहेका थापालाई बाह्रखरीका रोमन आचार्य र कुञ्जरमणी भट्टराईले सोही स्थानमा पुगेर चुनावी तयारीका प्रश्न गरेका छन् । प्रस्तुत छ संवादको सम्पादित अंश :–

तेस्रोपटक निर्वाचित सांसद बन्ने दाउमा हुनुहुन्छ । कस्तो पाउँदै हुनुहुन्छ माहोल ? 

म यसअघि जनताकहाँ आउँदा जस्तो माहोल थियो अहिले पनि त्यस्तै छ । पहिलो र दोस्रोपटक चुनावी अभियानमा आउँदा जस्तो हार्दिकता थियो अहिले पनि त्यस्तै छ ।

घरदैलोको क्रममा कतिपयका गुनासा देखिए, अलमललाई बुझाउने मौका पनि पायौँ ।

आफ्नै राजनीतिको रिर्टायडमेन्टको घोषणा गरिसक्नुभएको छ । अघिल्लो पुस्ताले छाड्नुपर्छ भन्नुभएको छ । यसलाई तपाईंका मतदाताले कसरी लिएका रहेछन् ? 

नेपालको संसदीय व्यवस्थाले परिणाम दिन नसक्नुको एउटा ठूलो कारण भनेको चाहिँ नेपालको राजनीतिक दलभित्र एउटा तहको नेतृत्वको पूर्णतः कब्जा रहने र प्रकारान्तरले त्यही कुरा संसद्भित्र पनि शक्तिको रुपमा रहने अवस्था छ । 

जसको कारणले नेपालमा भूतपूर्व प्रधामन्त्रीहरुले चलाएको देश बनेको अवस्था सिर्जना भएको छ ।  यसलाई नबदलिकन हाम्रो प्रणालीले ‘डेलिभर’ गर्न सक्दैन । 

किनकि त्यो हुटहुटी छटपटी अति आवश्यकता र डर पाका नेतृत्वमा हुँदै हुँदैन । पार्टीमा आफ्नो कब्जा छँदैछ, निर्वाचन जितिहालिन्छ अनि डर के को हुन्छ र ? 

कहिल्यै छोड्नुपर्दैन भन्ने सोच देखिन्छ ।

यहाँ त नेपालको ठूलो राजनीतिक दलको संसदीय दलको चुनावसमेत नहुने भयो किनकि संसदीय दलभित्र कसैले चुनौती पनि दिन नसक्ने भयो । 

तलको जनताको तहमा चाहिँ यति ठूलो परिवर्तन खोजेको छ राजनीतिक यथार्थता चाहिँ संसदीय दलको चुनावसमेत नहुने अवस्था आउँदै गर्दा कम्तिमा मैले चाहिँ सार्वजनिक रुपमा अठोट व्यक्त गरेको भनेको चाहिँ म त्यो लडाईं लड्छु । 

म संसदभित्र गएर चुनौती दिन्छु र बदल्ने प्रयास गर्छु ।  मेरो अठोट चाहिँ बदलेर छाड्छु भन्ने हो । 

त्यो कुरा आफ्नो मतदातालाई भनेको छु र मतदाताले किन विश्वास गर्नुभएको छ भने उहाँहरुले नजिकबाट देख्नुभएको छ । 

म लडेर आएको र लड्छु भनेपछि लड्ने मान्छे हो भनेर उहाँहरुलाई थाहा छ । यसले आशा र उत्साहको सञ्चार गरेको छ । 

प्रधानमन्त्री बन्छु भनेर बोलिरहनुभएको छ, यो भोट तान्नमात्रै हो कि साँच्चै व्यवहारमा लागू गर्न पनि हो ? 

४ गते मंसिरमा चुनाव हुन्छ । ७,८ गते परिणाम आउला । 

मंसिरको मसान्तमा कांग्रेस संसदीय दलको चुनाव त होला नि अनि त्यो संसदीय चुनाव नलड्ने सुविधा त मसँग छँदै छैन । 

म १३औं महाधिवेशनमा महामन्त्री लड्छु भनेर अठोट गरेपछि आफ्नै ससुरा बासँग चुनाव लडेको हो नि । 

त्यसकारणले योसँग जोडिएको राजनीतिक जोखिम मलाई थाहा छ । 

त्यो थाहा पाएर पनि मैले किन पटकपटक भनिरहेको भने त्यो भन्ने कुराले मलाई बाँध्छ अनि म सँग दाँयाबाँया गर्ने सुविधानै रहँदैन । 

गगन थापा, विश्वप्रकाश शर्मा र प्रदीप पौडेल संसद्मा हुनुपर्छ भन्ने नारा पनि सुनियो, त्यो सम्भावना होला ?

यो एकदमै सकारात्मक र उत्साह थप्ने विषय हो । 

यदि मान्छेले नेपालमा मानिसहरुले ठूलो राजनीतिक बदलाव खोजेको हो भने त म प्रधानमन्त्री बन्छु भनिरहेको छु म संसद्मा पुग्नुपर्ला नि । 

प्रधानमन्त्री बनाउन मेरो प्रस्तावक बस्ने विश्वप्रकाश शर्मा संसद्मा पुग्नुपर्ला । मलाई मत हाल्ने प्रदीप पौडेल पुग्नुपर्छ । 

बदलाव चाहिँ राजनीतिक दलको नेतृत्वमा चमत्कार होस् भनेर खोज्ने अनि त्यो चमत्कार नभए पनि बदलावको भूकम्प ल्याउँछु भन्ने मान्छेलाई संसद् बाहिर राखियो भने त कहीँ कतै पुगिँदैन । 

यो क्षेत्र काठमाडौं ४ का लागि गर्नुपर्ने कामहरु चाहिँ के छन् ? 

यो क्षेत्रमा ०७०–७१ बाट सुरु गरिएका विकास निर्माणका पूर्वाधारहरु छन् यसलाई बिट मार्नुपर्ने बेला आएको छ । 

हामी अहिले कुरा गरिरहेको यही सडक हेर्दा ०७० मा सुरु भएको हो । 

त्यो अघि हामी हिँडेर पैदल आउथ्यौं यहाँ ।  आज हामी साथीहरुले निर्धक्क सवारीसाधन कुदाएर आउने मौका पाउनुभएको छ । 

यो क्षेत्र भरिएको पूर्वाधारको कुरा टुंगोमा पुर्याउन बाँकी छ केही नयाँ आवश्यक छ । मुख्य कुरा यहाँ खानेपानीको समस्या छ । 

जुन काठमाडौं उपत्यकासँग जोडिएको विषय हो ।  मेलम्ची खानेपानी वितरणलाई चाँडोभन्दा चाँडो ल्याउने र मेलम्ची आइसकेपछि पनि अभाव हुन्छ यहाँ । 

मेलम्ची भाग २ र ३ लाई पनि चाँडो टुंगोमा पुर्याउने त्यसकारण खानेपानीको विषयलाई टुंगोमा पुर्याउने प्राथमिकता अब मेरो हुन्छ । 

गठबन्धनभित्र सरसहयोग र समीकरण यहाँ सामान्य कि जटिल के पाउनुभयो ? 

हामीकहाँ सकारात्मक वातावरण छ । स्थानीय तह निर्वाचनमा मिलेर जान नसकेको भन्ने कुराहरुको केही गुनासो थियो । त्यो कुराहरुको मनमाझ भएको छ । 

प्रदेशमा नेकपा(एस) बाट कुसुम कार्की उमेदवार हुुनुहुन्छ अर्कोतिर कांग्रेसले नै पाएको छ ।  तर, समानुपातिकतर्फ प्रशस्त उमेदवार हुनुभएकोले गर्दा हामी एक ठाउँमा गोलवद्ध भएर हिडेका छौं । 

कार्यतालिका कार्यदिशा मिलेर बनाएका छौं ।  हाम्रोबीचमा हार्दिकता छ मतदातासम्म यसलाई लिएर जानुछ ।