नेपाली कांग्रेसको एउटा खेमाको नेतृत्व गरिरहेका नेता डा. शेखर कोइराला आसन्न निर्वाचनमा मोरङ क्षेत्र नम्बर–६ बाट प्रतिनिधिसभा सदस्य पदका लागि प्रतिस्पर्धामा छन् । चुनावी प्रचारप्रसारका क्रममा रहेका उनले बिहीबार गृहनगर विराटनगरस्थित कोइराला निवासमा सञ्चारकर्मीसँग कुराकानी गरे । प्रस्तुत छ, नेता कोइरालासँग गरिएको कुराकानीको सम्पादित अंश :

कांग्रेसमा देखिएको विवाद अहिले कुन अवस्थामा छ ?
मैले शेरबहादुर देउवा र म नै मिलिसकेपछि तल विवाद किन गर्नुहुन्छ भन्दा पनि तल छिटपुट केही समस्या छन् । पूरै समाधान भयो भनेर म भन्दिनँ । हामी सबै एक ठाउँमा छँदा पनि किन बोलेको भन्छन् ।

कांग्रेसले ९१ क्षेत्रमा उमेदवार उठाएको छ, माहोल कस्तो छ ? 
अहिल्यै भन्न सकिँदैन । कसैले पनि भन्न सक्दैन होला । २०–२२ गते पछाडिको चुनावी अवस्थाले मात्रै केही आकलन गर्न सकिएला । देशभरि दुई कुरा देखिएको छ । कांग्रेसभित्रको आन्तरिक तुस विस्तारै कम भइरहेको छ । अर्को कुरा, गठबन्धन साथीहरूसित कसरी साथै अघि बढेर जित्ने भन्ने छ । जहाँ कांग्रेस उठेको छैन, ती ठाउँमा के कस्तो होला भन्ने छ । बाँकी नउठेका निर्वाचन क्षेत्रमा के कसरी अघि जाने भन्ने छ ।

स्थानीय तह निर्वाचनमा आएको मतलाई आधार मानेर दलको उपस्थितिबारे विभिन्न अड्कलबाजी भइरहेका छन्, के भन्नुहुन्छ ?
स्थानीय तह निर्वाचनको मतलाई मात्र आधार मान्न सक्ने अवस्था छैन । स्थानीय तहको चुनाव फरक विषय भयो । धेरै वडाहरूको मत जोड्दा भनिएको होला । स्थानीय रूपमा लोकप्रिय उमेदवारलाई धेरै मत आएको छ । उमेदवार वडासँग सम्बन्धित हुन्छन् । कस्तो मान्छे उठेका छन्, त्यसले फरक पर्ने कुरा हो । व्यक्तिसित वडाका उमेदवार टाँसिएका हुन्छन् । जनतासँगै काम गरेका हुन्छन् । हरेक दिन जोडिएका मानिस उठेका कारण कसैले प्राप्त गरेको मत धेरैथोर भएको हुनसक्छ ।

गठबन्धन दलहरूका फरक–फरक घोषणापत्र छन्, सबै एकै ठाउँ रहेर मत माग्न जाँदा फरक पर्दैन ?
हो, गठबन्धनमै रहेका दलहरूले पनि आ–आफ्नो घोषणापत्र लिएर आएका छन् । फरक–फरक नीतिहरू छन् । जस्तो : नेकपा (माओवादी केन्द्र)ले प्रत्यक्ष राष्ट्रपति भनेको छ । मत माग्न जाँदा हामीलाई जनताले यस्ता विषयमा प्रश्न गरिरहेका छन् । दलहरूको अलग–अलग घोषणापत्रबारे चुनावी कार्यक्रमहरूमा पनि प्रशस्तै प्रश्न उठ्ने गरेका छन् । तर, हामी गठबन्धनमा छौँ । एउटा उद्देश्यको लागि छौँ भनेर बुझाउने काम गरेका छौँ ।

यसले चुनावी अभियानमा असर गर्दैन ?
अलि–अलि पार्दो होला, त्यस्तो धेरै फरक नपर्ला । हामीले पनि मतदातालाई गठबन्धनको महत्त्वको विषयमा बुझाउने प्रयास गरिरहेका छौँ ।

गठबन्धन दलका उमेदवार मिलेरै चुनावी अभियानमा लाग्नुभएको छ ? 
हामी सबै उमेदवार सँगै हिँडिरहेका छौँ । संयुक्त कार्यक्रमहरू भइरहेका छन् । सँगसँगै उमेदवारले चुनावी अभियान सञ्चालन गरिरहेका छौँ । कतिपय ठाउँमा कठिनाइ भए पनि हामीले सञ्चालन गरिरहेका छौँ ।

सबै उमेदवार सँगै हिँड्दा प्रदेशको एजेन्डा छायामा पर्‍यो भन्ने सुनिन्छ नि ?
प्रदेशका उमेदवारहरूसँगै चुनावी अभियान सञ्चालन भइरहेको छ । प्रदेशको खासमा यो एजेन्डा हो भन्ने बुझाउन जरुरी छ । नेपाली कांग्रेसले प्रतिनिधिसभाका लागि घोषणापत्र बनाएको छ । तर, प्रदेशको घोषणापत्र आउन ढिलाइ भएको छ । प्रदेशसभाका उमेदवारहरूले पनि आफ्नो विषय उठाउनुपर्छ ।

खासमा प्रदेशको एजेन्डा प्रहरी प्रशासन, प्रमुख जिल्ला अधिकारी अनि स्थानीय तहका सचिवहरू प्रदेश मातहत हुनुपर्छ भन्ने हो । यो विषय उमेदवारले उठाउनुपर्छ । प्रदेश र प्रतिनिधिसभाको निर्वाचन अलग–अलग ढंगले गर्नुपर्छ । प्रदेश र संघीय सरकारले समन्वय गरेर गर्नुपर्ने धेरै कामहरू छन् । ओली र देउवा सरकारको पालामा पनि प्रदेशसँग समन्वय हुन नसकेको मेरो महसुस छ । प्रदेशका बारेमा जनस्तरमा नकारात्मक धारणा बन्न दिनु हुँदैन । यो काम अहिले पनि भइरहेको छ भन्ने मेरो बुझाइ छ ।

निर्वाचनपछि कस्तो सरकार बन्ला ? तपाईंलाई पनि प्रधानमन्त्रीको दाबेदार मानिन्छ, के भन्नुहुन्छ ?
नेपाली कांग्रेसको नेतृत्वमा सरकार बन्छ । गठबन्धनको सरकार नै बन्ने हो । मैले अहिलेसम्म दाबी गरेको छैन । अरू पार्टीका साथीहरूको दाबी रहेको पनि सुन्नमा आएको छ । दाबी नै गर्न नपाउने भन्ने हुँदैन ।

बागी उमेदवार पनि छन् नि !
पार्टीभित्र सानातिना समस्या छन् । तर, चुनाव नजिकिँदै जाँदा क्रमशः कम हुँदै पनि जानेछन् । मैले देशभरि बागीलाई फिर्ता लिन लगाएको छु । १६ भन्दा धेरै ठाउँमा फिर्ता पनि भयो । तर, मोरङमै फिर्ता हुन मानेका छैनन् । अझै समय छ । कतिय ठाउँमा पार्टीका उमेदवारलाई सघाउन लगाउने प्रयासहरू पनि जारी नै रहनेछन् ।