मंसिर ४ गते हुने प्रतिनिधिसभा निर्वाचनका लागि मोरङ क्षेत्र नम्बर ३ बाट डा. सुनील शर्मा चुनावी मैदानमा छन् । 

पाँच दलिय गठबन्धनको तर्फबाट कांग्रेस नेता डा. शर्मा साझा उमेदवारको रुपमा चुनावी मैदानमा होमिएका हुन् । 

उनीसँग चुनाव भिड्न पूर्व स्वास्थ्यमन्त्री तथा नेकपा एमाले नेता भानुभक्त ढकाल तथा राप्रपाबाट नायिका रेखा थापा पनि चुनावी मैदानमा छन् । 

मेडिकल कलेजका मालिक शर्माले ०७४ को निर्वाचन पनि यहाँबाट लडेका थिए ।  तर, तत्कालीन वाम गठबन्धनका उमेदवार भानुभक्त ढकालसँग उनी पराजित हुुनु परेको थियो । 

सोही पराजयको बदला लिने र गठबन्धनको सहयोगमा चुनाव जितेर सांसद बन्ने सपना शर्माको छ । 

उनै शर्मासँग बाह्रखरीले चुनावी बहस गरेको छ । प्रस्तुत छ शर्मासँग बाह्रखरीका कुमार लुइँटेल र रोमन आचार्यले विराटनगर पुगेर गरेको संवादको सम्पादित अंश :–

चुनाव आउन धेरै दिन बाँकी छैन । पाँच दलको गठबन्धन मिलेर चुनाव लड्दैहुनुहुन्छ । कांग्रेस पार्टी आफैँभित्र एकता धेरै देखिँदैन भने गठबन्धनभित्र एकता छ यहाँ ?

कांग्रेस मासवेस पार्टी हो । मुलतः नेतृत्वबीचमा कुनै समस्या छैन ।  हिजो महाधिवेशनको समयमा दुई समूहको नेतृत्व गर्ने मुलीहरुनै अहिले मिलेका छन् । 

सानातिना छिटपुट असन्तुष्ट जहाँ पनि हुन्छन् , यहाँ पनि होला । 

त्यसलाई मिलाउने काम हामी गरिरहेका छौं । यो सबै पार्टीमा हुन्छ । शेरबहादुर देउवाको क्षेत्रमा कर्ण मल्लले विद्रोह गरिरहँदा यहाँ त देशभरिकै कम विवाद र समस्या छ । 

एक ढिक्का छौं र रहेका छिटपुट समस्यालाई अबको पाँच छ दिनभित्र समाधान गरिसक्छौं । 

अर्को कुरा गठबन्धनमा रहेका दलहरुको कुरा गर्दा माओवादी र नेकपा(एस) को गठबन्धनप्रति प्रतिवद्धता देख्दा मलाई लोभ लाग्छ । 

बरु हामी त्यति लागेका छैनौं होला , उहाँहरु गठबन्धनप्रति निष्ठावान् त्यतिधेरै हुनुहुन्छ । मलाई जिताउन गरेको उहाँको प्रयास देखेर म त ऋणी छु । 

तपाईं चुनाव प्रचारमा व्यस्त हुनुहुन्छ, मतदाताको घरदैलो पुगिरहँदा उनीहरुको अपेक्षा आशा के पाउनुभयो ? 

मैले टिकट पाइसकेपश्चात् प्रायः गाउँहरु म पुगिसकेको छु । जनतामा ठूलो गुनासो भेटिन ।  तर, चुनाव जितेर गएका नेता पाँचवर्षमा गाउँ फर्केर नआएको गुनासो उहाँहरुमा रहेछ । 

त्यसबाट चुनाव जितेपश्चात् गाउँ पुग्नुपर्ने अपरिहार्यता मैले महसुस गरे ।  जितेर गएका नेता गाउँ विकासमा घोसेमुन्टो लगाएर हिँडेको गुनासो छ । 

कोरोना जस्तो विश्व महामारीको समयमा समेत गाउँलाई नसम्झिाएको गुनासो उहाँहरुमा छ । 

जनताले भ्रष्टाचार नगर्ने नेता खोजेका छन् । राजनीतिमा वितृष्णा बढाउने र भ्रष्ट नेताले गाउँ नटेकुन् भन्ने चाहना जनतामा रहेछ । 

विकासका लागि आएको बजेट विकासमै पूर्ण खर्चहुनुपर्छ भन्ने यहाँको सचेत नागरिकको चाहना छ । 

तटबन्धन, सानो पैनी, बाटोको स्तरन्नति, बिजुली पोलको व्यवस्था, खानेपानी जस्ता सामान्य तर दैनिक आवश्यक्ता पूर्तिमा सहजता खोजेका छन् । 

र, महत्वपूर्ण चाहिँ नेपाल सरकारको स्वास्थ्यविमा कार्यक्रम झन्झटिलो भयो यसलाई सहज बनाउने तथा इन्स्योरेन्सले देशमा मात्र होइन विदेशमा पनि उपचार खर्च प्रयोग गर्न पाउनुपर्यो भन्ने छ । 

अनि शिक्षाको गुणस्तर बढाएर सार्वजनिक विद्यालयमा पनि अंग्रेजी माध्यममा गुणस्तरीय शिक्षाको माग जनताले गरेका छन् । 

सामान्य मागभित्र सिङ्गो आवश्यकता लुकेको हुन्छ । जनताले मागेका छन्, तपाईंले दिने सेवा चाहिँ के हुनेछ ? जित्ने आधार के हो त ? 

स्थानीय तह निर्वाचनबाट काठमाडौंमा बालेन र धरानमा हर्कको माध्यमबाट जनताले भ्रष्टाचारी नेता चाहिँदैन भनेर सन्देश दिन खोजेको हो । 

त्यो सर्त पूरा गर्न सक्ने मोरङ्ग क्षेत्र नम्बर ३ मा सुनिल शर्मा अर्थात् म मात्र हो । यसमा म पूरा दावा गर्न सक्छु । 

मैले अहिलेसम्म सरकारी सेवामा प्रवेश गरेर भ्रष्टाचार गर्दै हिँडेको त छैन नि । कुनै भ्रष्टाचार सम्बन्धी मुद्दा त छैन नि । 

विगत चार वर्षदेखि शिक्षा र स्वास्थ्यमा राज्यलाई मैले सबैभन्दा धेरै कर बुझाइरहेको छु । 

एउटा सांसदले पाउने रकम ५ करोड होइन ? मैले स्वेच्छिक रुपमा ४–५ करोड त जनताको शिक्षामा र स्वास्थ्यमा खर्च गरिरहेको छु । 

अब भन्नुस् मैले वर्षको पाँच करोड किन राज्यबाट भ्रष्टाचार गर्नुपर्यो ? जनताले चाहेको योग्य उमेदवार म हो । जनताले मलाई भोट दिनेमा म विश्वस्त छु । 

तर चुनावी भिडन्त पूर्वस्वास्थ्मन्त्रीमात्र होइन चर्चित नायिका रेखा थापासँग पनि छ । यो चुनौतीपूर्ण चुनावी प्रतिष्पर्धा होइन र ? 

प्रतिष्पर्धा अहिले दुईबीच हो । सत्य कुरा के हो भने मेरो प्रतिष्पर्धा एमाले उमेदवार भानुभक्त ढकालसँगै हो ।

सांगठनिक संरचनाले पनि त्यसलाई पुष्टि गर्छ नि । रेखाजी त लामो समय यहाँ बस्नुनै भएन । उहाँको क्षेत्र पनि चलचित्र बन्यो । 

योगदानको कुरा गरौं न । समाजमा थिचिएर रहेको सतार समुदायबाट पनि प्रतिनिधित्व हुनेगरि डाक्टर बनाउन योगदान मैले गरे । 

सात सय बढी बच्चाहरुलाई मेडिकल पारामेडिकल पढाइसकेँ ।  एक लाख २० हजार नागरिकलाई यहाँबाट लगेर कम्तिमा ५० प्रतिशत र बढीमा पुरै फ्रि गरेर उपचार गरिसके । 

जनतामाझ तपाईंले प्रस्तुत गरिरहेको संकल्प चाहिँ के हो ?

लोहन्द्राको बाँधको समस्या छ । जनता एकदमै पीडित भएका छन् । अन्य खोलाहरुको समस्या पनि उस्तै छ । यी समस्या राष्ट्रिय आयोजनामा नपारी सुख छैन । किसानहरुलाई कुलोको राम्रो व्यवस्था गरेर आत्मनिर्भर कृषी क्षेत्र बनाउनु छ । म त्यो सक्छु र गर्छु । बाटो पिच गर्नुपर्ने, ग्राभेल गर्नुपर्ने, फराकिलो बनाउनुपर्नेलगायत समस्या छ । 

यो सबै त चुनावी वाचामात्रै हो कि ? मतदाता  पनि त्यस्तै भन्छन् ...

गत निर्वाचन अघि त्यो आरोप थियो । एमालेका साथीहरुले निकै फण्डा बनाउनुभयो । अहिले अवस्था त्यस्तो छैन । म निरन्तर जनतासँग छु । उहाँहरुले माया गर्नुभएको छ र गर्नुहुन्छ भन्नेमा म विश्वस्त छु । 

अन्त्यमा स्वास्थ्य क्षेत्रमा गर्नुपर्ने सुधार के के हुन्, कसरी सुधार गर्न सकिन्छ ? के लाग्छ तपाईंलाईं ? 

स्वास्थ्य विमालाई पाँच लाख बनायो र विश्वबजारमा जुनसुकै कुनाबाट पनि त्यसको उपभोग गर्न जनताले पायो भने ९५ प्रतिशत जनताको समस्याको हल हुन्छ । 

त्यसले कभर गर्छ । ठूला ठूला रोगमा सरकारले छुट्टै नीति लिएको छ । 

किड्नी, लिभर तथा अंगदानमा रकम अलि बढाउने र डायलिसलाई अलि व्यवस्थित गरेर बीमा रकम ५ लाख बनाउने हो भने समस्या समाधान हुन्छ ।