विराटनगर । विराटनगरमा यति बेला छठ पर्वको हर्षोल्लास छ । तराई–मधेसमा छठलाई विशेष महत्त्वसाथ मनाउने गरिन्छ । चार दिनसम्म श्रद्धापूर्वक मनाइने यो पर्वको पहिलो दिन आज ‘नहाय–खाय’ हो ।

प्रदेश नम्बर–१ को राजधानी विराटनगरमा छठको मुख्य दिनका लागि भव्य तयारी गरिएको छ । सिंघिया खोला, केसलिया खोला र सुनसरी–मोरङ सिँचाइ आयोजनाको नहरमा घाट तयार गरिएको छ ।

छठ पूजा समारोह समितिले विराटनगरका खोलानालामा सफाइ गरी घाट सजाउँदै छ । विराटनगर महानगरपालिका–१२, पिचर स्थित नहरमा छठघाट निर्माण कार्यलाई तीव्रता दिइएको छ ।

विराटनगरको मुख्य बजार र गुदरीमा पूजा सामग्री किनमेल गर्नेको समेत घुइँचो देखिएको छ ।

छठको मुख्य दिन षष्ठी तिथिमा निराहार व्रत बसेर साँझपख पवित्र जलाशयमा गई अस्ताउँदो सूर्यलाई अर्घ्य दिने गरिन्छ । सप्तमीका दिन बिहान उदाउँदो सूर्यलाई अर्घ्य दिएपछि छठ पर्व सम्पन्न हुन्छ ।

थप तस्बिर हेर्नोस्–