बुटवल । नेकपा एमाले उपाध्यक्ष तथा पूर्वअर्थमन्त्री विष्णु पौडेलले वर्तमान सरकारको असफलताका कारण मुलुकमा आर्थिक संकट गहिरिएको बताएका छन् । केपी शर्मा ओली नेतृत्वको तत्कालीन सरकार ढलाएर अध्यादेशको सरकार बनाउने खेलले मुलुकमा अस्थिर राजनीतिको सुरुआत गर्नु नै आर्थिक संकटको पहिलो कारण भएको उनले भनाइ छ ।
  
शनिबार बिहान बुटवलमा उद्योगी तथा व्यवसायीको भेलालाई संवोधन गर्दै रूपन्देही २ का प्रतिनिधिसभा सदस्य पदका उमेदवारसमेत रहेका पौडेलले सरकारबाटै निजी क्षेत्रको घाँटी निमोठ्ने काम भएको टिप्पणी गरे । 

“सरकारको गलत आर्थिक नीतिका कारण निजी क्षेत्र पलायन हुने तथा श्रमिकको घरमा आगो नबल्ने अवस्था आयो”, पौडेलले भने,  “मुलुकमा चरम मूल्यवृद्धि भएको छ । म अर्थमन्त्री हुँदा ४ दशमलव २ प्रतिशतमा रहेको मूल्यवृद्धि दर अहिले बढेर ८ दशमलव १ प्रतिशतमा पुगेको छ ।”

अस्वभाविक रुपमा करको दर हेरफेर, बैंक ऋणको ब्याजदरमा उच्च वृद्धिलगायत कारणले निजी क्षेत्रलाई सरकारबाटै आतंकित बनाउने काम भएको उनले बताए ।

गठबन्धनको नाममा सत्ता स्वार्थ र केही निहीत व्यक्तिको स्वार्थ पूर्तिका लागि अपनाइएको आर्थिक नीतिले मुलुकको उद्योग व्यवसाय ध्वस्त हुने अवस्थामा पौडेलले बताए ।

सरकारले बैंकको ब्याजदरमा उच्च वृद्धि गरेपछि आन्दोलनरत उद्योगी व्यवसायीहरुको मागप्रति ऐक्यवद्धता जनाउँदै पौडेलले उनीहरुको माग पूरा गराउनका लागि आफ्नो साथ रहेको उल्लेख गरे ।